Eina ráðið við aukinni fólksfjölgun er að byggja meira
Ef spá Hagstofunnar um fjölgun íbúa gengur eftir, þó ekki væri nema hluti af henni, þá er mikil þörf á auknum fjölda íbúða á næstu árum, segir Ingólfur Bender, aðalhagfræðingur SI, í morgunútvarpi Rásar 2 í morgun. Aðspurður um hvernig bregðast eigi við því segir hann bara eitt ráð og það er að byggja meira. „Sveitarfélög girði sig í brók og geri betur í að bjóða land til íbúðabygginga en það hefur skort talsvert upp á það hér á höfuðborgarsvæðinu, ekki síst hjá Reykjavíkurborg á síðustu árum. Það hefur valdið þessum skorti og síðan þá aftur hafa afleiðingar verið þessi mikla verðhækkun á íbúðarhúsnæði.“
Ingólfur segir að á þessu ári höfum við séð mikla fólksfjölgun sem komi til af því að það er lítið atvinnuleysi og skortur á vinnuafli sem kallar á innflutning á vinnuafli sem eykur síðan eftirspurn eftir húsnæði. „Þetta er ofan í ástand þar sem er talsverð uppsöfnuð þörf sem metin er í kringum 5.000 íbúðir af Íbúðalánasjóði nýverið og það sem er að detta inn á markaðinn af nýju húsnæði á þessu ári er ekki nándar nærri það sem þörfin er fyrir.“
Hann segir að vegna þéttinga byggðar og vegna þeirra tafa sem það myndar í kerfinu þá séu færri íbúðir á dagskránni fram til ársins 2020 samkvæmt spá Samtaka iðnaðarins og muni þar um 7-800 íbúðir.
Hér er hægt að hlusta á umfjöllunina í morgunþættir Rásar 2 í heild sinni.