Haldið áfram að safna áli í sprittkertum
Góðar undirtektir voru við tilraunaátaki um söfnun áls í sprittkertum sem stóð yfir í desember og janúar undir yfirskriftinni „Gefum jólaljósum lengra líf“. Tilgangurinn með átakinu var að efla vitund þjóðarinnar um mikilvægi þess að flokka og endurvinna það ál sem fellur til hjá heimilum og fyrirtækjum. Nú hafa þau fyrirtæki og samtök sem stóðu að endurvinnsluátakinu ákveðið að halda áfram söfnun áls í sprittkertum og gera þetta að varanlegum kosti í flokkun og endurvinnslu hér á landi. Að átakinu standa Endurvinnslan, Fura, Gámaþjónustan, Grænir skátar, Íslenska gámafélagið, Málmsteypan Hella, Plastiðjan Bjarg, Samtök iðnaðarins, Samál og Sorpa.
Almenningi stendur því áfram til boða að skila álinu í sprittkertum á um 90 endurvinnslu- og móttökustöðvar um allt land á vegum Endurvinnslunnar, Gámaþjónustunnar, Íslenska gámafélagsins og Sorpu. Einnig má skila því í um 120 dósagáma Grænna skáta á höfuðborgarsvæðinu. Loks má setja álbikarana eins og aðra málma sem til falla á heimilum í grænar tunnur Íslenska gámafélagsins og endurvinnslutunnur Gámaþjónustunnar. Tekið er á móti kertavaxi hjá Plastiðjunni Bjargi – iðjuþjálfun og Öldunni Borgarnesi og ný kerti unnin úr því.
Allt ál sem safnast hér á landi fer til endurvinnslu
Innan fárra vikna skýrist betur hversu mikið af áli safnaðist í átakinu, en tíma tekur að safna því öllu á einn stað. Ljóst er að afraksturinn dugar í ófáar íslenskar pönnukökupönnur, en í eina slíka þarf um 700 sprittkerti. Allt ál sem safnast hérlendis fer til endurvinnslu, en á næstu vikum ræðst hvað verður um álið sem safnaðist í átakinu. Kosturinn við endurvinnslu áls er að það má endurvinna aftur og aftur án þess að það tapi upprunalegum gæðum. Þar sem til þess þarf einungis 5% af orkunni sem fór í að framleiða það upphaflega, þá skapast við það mikil verðmæti fyrir endurvinnsluiðnaðinn í heiminum. Endurvinnsla áls dregur verulega úr losun gróðurhúsalofttegunda en í álframleiðslu verður almennt mest losun við orkuvinnsluna.
Nánar um átakið á heimasíðu Samáls og á Facebook.
Myndin er frá móttöku áls í sprittkertum á Sorpu Sævarhöfða.