Heimsóttu fimm húsgagna- og innréttingaframleiðendur
Sigurður Hannesson, framkvæmdastjóri SI, og Jóhanna Klara Stefánsdóttir, sviðsstjóri mannvirkjasviðs SI, hittu húsgagna- og innréttingaframleiðendur í vikunni. Um er að ræða aðildarfyrirtækin GÁ, Sýrusson, AXIS, Á. Guðmundsson og Agustav.
Íslensk húsgagnaframleiðsla og hönnun prýðir fyrirtæki, stofnanir og heimili um allt land. Fyrirtækin smíða eftir séróskum viðskiptavina sinna auk þess að framleiða eftir eigin hönnun. Í samtölum við forsvarsmenn fyrirtækjanna kom meðal annars fram að nokkuð væri um útflutning en það væri ennþá óplægður akur. Rætt var um góðan árangur Skandinava á þessu sviði þar sem fylgt væri skýrri sýn og markvissri stefnu að gera innlenda húsgagna- og innréttingaframleiðslu sýnilega. Þar er einkennandi að innlend hönnun á sinn sess hjá hinu opinbera, í fyrirtækjum og á heimilum. Sama megi segja um sýnileika innlendrar framleiðslu bæði í kvikmyndum og sjónvarpsþáttum. Þá var samhljómur í því meðal fyrirtækjanna fimm að gæði væri það sem einkenndi íslenska húsgagna- og innréttingaframleiðslu og verðin væru vel samkeppnishæf miðað við gæðin.
Á myndinni fyrir ofan er Guðmundur Ásgeirsson, framkvæmdastjóri Á. Guðmundsson og formaður Félags húsgagna- og innréttingaframleiðenda, Sigurður Hannesson, framkvæmdastjóri SI, og Jóhanna Klara Stefánsdóttir, sviðsstjóri mannvirkjasviðs SI.
Hjá GÁ hittu þau Jóhanna Klara og Sigurður þá Grétar Árnason, framkvæmdastjóra, og Arnar Páll Unnarsson.
Hér sitja þau Jóhanna Klara og Sigurður með Eyjólfi Eyjólfssyni, framkvæmdastjóra, í sófa sem er hannaður og framleiddur hjá AXIS.
Gústav Jóhannsson, annar helmingurinn hjá AGUSTAV, tók á móti þeim Sigurði og Jóhönnu Klöru.
Í Sýrusson hittu þau Sigurður og Jóhanna Klara Sigurjón Kristensen og Reyni Sýrusson, framkvæmdastjóra.