Iðnaður hefur átt stóran þátt í núverandi efnahagsuppsveiflu
Iðnaður er mjög umfangsmikill í íslensku efnahagslífi. Greinin er fjölþætt og snertir nær alla þætti hagkerfisins. Hefur greinin átt stóran þátt í núverandi efnahagsuppsveiflu og skapað nær eitt af hverjum fjórum störfum sem myndast hafa í hagkerfinu frá því að það byrjaði að taka við sér 2010. Greinin hefur þannig átt stóran þátt í því að ná niður atvinnuleysinu sem var eitt helsta mein íslensks hagkerfis eftir efnahagsáfallið 2008. Hefur greinin skilað um þriðjungi hagvaxtarins á þessum tíma.
Iðnaður skapar 29% landsframleiðslunnar
Íslenskur iðnaður er umfangsmikill í íslensku efnahagslífi. Innan iðnaðar er fjölbreytt flóra af fyrirtækjum sem eru samofin öllum sviðum efnahagslífsins. Iðnaðarstarfsemi hér á landi er því afar mikilvægur þáttur í gangverki hagkerfisins sem skapar margvísleg störf. Skapaði greinin ríflega 29% landsframleiðslunnar með beinum hætti á árinu 2016 eða 705 ma.kr. Ef með er tekinn óbeint framlag greinarinnar til verðmætasköpunar hagkerfisins er umfang hennar umtalsvert meira. Nánar má lesa um þátt greinarinnar í verðmætasköpuninni hér.
Einn af hverjum fimm starfa í iðnaði
Iðnaður er umfangsmikill á íslenskum vinnumarkaði. Ríflega 38 þúsund launþegar voru í iðnaði á síðastliðnu ári. Eru störfin fjölbreytileg á sviði framleiðsluiðnaðar, byggingarstarfsemi og mannvirkjagerðar og tækni- og hugverkaiðnaðar. Í fyrra voru 21% launþega hér á landi í iðnaði eða ríflega einn af hverjum fimm. Nánar má lesa um þátt greinarinnar í vinnumarkaði hér.
Iðnaður skapar 36% gjaldeyristekna
Gjaldeyristekjur fyrirtækja í iðnaði námu í fyrra 422 mö.kr. eða 36% af heildargjaldeyristekjum þjóðarbúsins af útflutningi vöru og þjónustu árið 2016. Tekjurnar eru af fjölþættri starfsemi iðnaðar á sviði framleiðslu-, hugverka- og byggingariðnaðar. Nánar má lesa um þátt greinarinnar í gjaldeyrissköpuninni hér.
Velta í iðnaði 1.357 milljarðar króna á síðasta ári
Velta í iðnaði nam 1.357 mö.kr. á síðasta ári. Um er að ræða um 33% af allri virðisaukaskattskyldri veltu fyrirtækja í landinu. Undirstrikar það hlutfall mikið umfang iðnaðar í hagkerfinu. Er hlutfallið svipað og það hefur mælst að meðaltali í þessari efnahagsuppsveiflu. Nánar má lesa um þátt greinarinnar í veltu fyrirtækjanna hér.
Ingólfur Bender, hagfræðingur SI
ingolfur@si.is, s. 8246105