LÖG

LANDSSAMBANDS BAKARAMEISTARA

Nafn og aðsetur

1. gr.

Sambandið heitir Landssamband bakarameistara, sem skammstafað er LABAK.

2.gr.

Heimili þess og varnarþing er í Reykjavík

Markmið og tilgangur

3. gr.

Markmið og tilgangur LABAK er:

a) Að safna saman í ein samtök öllum bakarameisturum og fyrirtækjum sem standa að rekstri brauða- og kökugerða, enda hafi þessi fyrirtæki í þjónustu sinni bakarameistara.

b) Að gæta hagsmuna sambandsaðila í kaupgjaldsmálum gagnvart opinberum aðilum og öðrum þeim sem sambandsaðilar skipta við. LABAK skal koma fram sem sameiginlegur aðili fyrir aðila að sambandinu að því er varðar kaupgjaldsmál.

c) Að vinna að aukinni menntun, verkkunnáttu og vöruvöndun í greininni, svo og að standa fyrir kynningu og fræðslu á þeim sviðum er bakaraiðnina varðar.

Aðild að sambandinu

4. gr.

Rétt til aðildar að LABAK sem fullgildir meðlimir hafa allir bakarameistarar og fyrirtæki sem standa fyrir rekstri brauð- og kökugerða, enda hafi þessi fyrirtæki í þjónustu sinni bakarameistara. Aukafélagar geta þeir orðið sem verið hafa fullgildir aðilar en hættir eru störfum í greininni.

5. gr.

Umsókn um inngöngu í LABAK skal vera skrifleg og sendast til stjórnar. Skulu umsókninni fylgja öll nauðsynleg gögn sem sýni að umsækjandi uppfylli öll skilyrði um inngöngu. Umsækjandi telst hafa hlotið inngöngu í LABAK þegar stjórnin hefur samþykkt inntökubeiðni hans. Komist stjórnin ekki að niðurstöðu um hvort taka beri umsókn til greina, skal skjóta ákvörðun til næsta aðalfundar.

Úrsögn úr sambandinu

6. gr.

Úrsögn úr LABAK skal vera skrifleg og taka gildi að liðnum þremur mánuðum frá því hún var tilkynnt. Úrsögn skal einungis taka gildi að viðkomandi liggi ekki undir kæru fyrir brot á lögum LABAK eða samþykktum stjórnar þess. Enginn má segja sig úr LABAK meðan vinnudeila stendur yfir, eða rekstrarstöðvun sem LABAK hefur samþykkt af öðrum sökum.

Brottvikning úr sambandinu

7. gr.

Stjórn er heimilt að víkja aðila úr LABAK um lengri eða skemmri tíma hafi viðkomandi gerst brotlegur við lög LABAK, eða samþykktir stjórnar þess. Sambandsstjórn skal ávallt leggja ákvörðun um brottvikningu fyrir næsta aðalfund LABAK til endanlegrar afgreiðslu. Brottvikning telst endanlega ákveðin þegar þrír fjórðu hlutar aðalfundarfulltrúa hafa samþykkt hana.

Aðild að heildarsamtökum

8. gr.

LABAK er aðili að Samtökum iðnaðarins og Samtökum atvinnulífsins.. Eðli málsins samkvæmt eru aðilar að LABAK bundnir lögum, fyrirmælum og samþykktum þessara samtaka, bæði þeim sem nú gilda og þeim sem síðar kunna að verða sett á löglegan hátt.

Aðalfundur

9. gr.

Aðalfundur LABAK skal haldinn fyrir lok maímánaðar ár hvert. Til fundarins skal boða bréflega með minnst 7 daga fyrirvara.

Dagskrá aðalfundar skal vera:

Skipun fundarstjóra og fundarritara.

a) Skýrsla stjórnar.

b) Lagðir fram endurskoðaðir reikningar fyrir liðið starfsár.

c) Fjárhagsáætlun fyrir næsta starfsár.

d) Lagabreytingar.

e) Kosningar:

Formaður til eins árs, stjórn til tveggja ára. Kjósa skal tvo stjórnarmenn í senn. Tveir endurskoðendur kosnir til eins árs í senn.

Nefndir: Laganefnd, 3 menn

Uppstillingarnefnd, 3 menn

Siðanefnd, 3 menn

Fræðslunefnd, 3 menn

f) Ákvörðun félagsgjalda.

g) Önnur mál.

Rétt til setu aðalfundar LABAK skulu allir aðilar hafa sem ekki eru brotlegir við lög þess og samþykktir og skulda ekki félagsgjöld. Lögmætir aðalfundir eru æðsta vald í öllum málefnum sambandsins.

Almennir félagsfundir

10. gr.

Almennir félagsfundir skulu haldnir þegar stjórn þykir þurfa og skal boða til þeirra bréflega eða með símskeyti þar sem helstu verkefna er getið. Almenna félagsfundi skal halda þegar 1/3 hluti sambandsaðila krefst þess. Geta skal þess hvers vegna fundar er krafist. Kröfu um almenna félagsfundi skal senda formanni sambandsins. Ber honum að boða fundinn innan þriggja daga frá því honum barst krafan.

11. gr.

Hver aðili að LABAK skal fara með eitt atkvæði á fundum, þó með þeirri undantekningu að þar sem tveir eða fleiri aðilar starfa hjá sama fyrirtæki, verði aðeins um eitt atkvæði að ræða. Þegar atkvæði eru greidd um atriði sem varða kaupgjald skal hver aðili hafa atkvæðamagn í hlutfalli við ársgreiðslur til LABAK. Ef tveir eða fleiri fulltrúrar eru frá sama fyrirtæki, skiptist atkvæðamagn á milli þeirra.

Starfsár

12. gr.

Starfsár félagsins er á milli aðalfunda, en reikningsárið er almanaksárið. Gjaldkeri skal afhenda endurskoðendum LABAK til endurskoðunar eigi síðar en viku fyrir aðalfund.

Stjórn

13. gr.

Stjórn LABAK skipa fimm félagar, sem kosnir eru á aðalfundi. Formann skal kjósa sérstaklega, árlega. Fjóra stjórnarmenn skal kjósa þannig: Tveir menn skulu kosnir til tveggja ára í senn á hverju ári. Stjórnin skiptir sjálf með sér verkum. Heimilt er stjórnarmönnum að taka við endurkjöri. Formaður skal boða til stjórnarfunda. Skylt er að boða til stjórnarfunda ef tveir eða fleiri stjórnarmenn krefjast þess. Stjórnin ræður málefnum félagsins milli funda. Skal hún annast framkvæmdir á samþykktum félagsfunda og vera í hvívetna á verði um hagsmuni LABAK. Stjórnarfundur er lögmætur ef meirihluti stjórnarmanna er mættur. Falli atkvæði jöfn ræður atkvæði formanns úrslitum. Kjörgengi til stjórnar hafa allir bakarameistarar og forráðamenn fyrirtækja er standa fyrir rekstri brauð- og kökugerða, sem teljast fullgildir meðlimir að LABAK skv. 4. gr.

Meðferð lagabrota

14. gr.

Sérhverjum aðila að LABAK er skylt að hlíta lögum og samþykktum þess. Brot gegn lögum og samþykktum LABAK varða sektum sem nema skulu að lágmarki minnstu upphæð árgjalda, en að hámarki hæstu upphæð árgjalda, eins og þau eru á hverjum tíma. Ákvörðun um sekt má skjóta til almenns félagsfundar til endanlegrar ákvörðunar. Ákvörðun slíks fundar telst einungis lögleg að helmingur atkvæðisbærra aðila að sambandinu hafi mætt. Sambandsstjórn er heimilt að innheimta sektina með málssókn.

Félagamerki í eigu LABAK

15. gr.

Aðeins eigandi og umsjónarmaður félagamerkja í eigu LABAK hafa rétt til að ráðstafa þeim til birtingar á umbúðum, í auglýsingum og/eða birta þau með öðrum hætti í kynningarskyni á afurðum sem tengjast vörulínu félagsins er félagamerki taka til.

Einungis félagsmenn LABAK mega kynna og selja vörur sem merktar eru félagamerki í eigu félagsins.

Öll notkun félagamerkja í eigu LABAK, að hluta til eða í heild, í rituðu, lesnu og prentuðu máli, er með öllu óheimil nema með skriflegu leyfi eiganda.

Með brot félagsmanna gegn þessari grein skal farið skv. 14. gr. laga þessara.

Lagabreytingar

16. gr.

Lögum LABAK má ekki breyta nema á löglegum aðalfundi, enda hafi þess verið getið í fundarboði að lagabreytingar yrðu til meðferðar á fundinum. Lagabreytingar þurfa samþykki ¾ fundarmanna til að ná fram að ganga.

Lögunum var síðast breytt á aðalfundi LABAK 13. mars 2004