Gæðahandbók	Dags.	27/3/03
		Bls.	1/1
		Höf.	Stjórn
		Ábm.	Stjórn
		Útgáfa	1
Skjal	Lög félagsins	Nr. 400-S

Lög Meistarafélags Suðurlands

1. gr.

Félagið heitir Meistarafélag Suðurlands, skammstafað MFS.

2. gr.

Heimili þess og varnarþing eru á Selfossi. Félagssvæðið er Árnessýsla, Rángárvallasýsla og Vestur Skaftafellssýsla.

3. gr.

Tilgangur félagsins er:

• Að safna saman í eitt félag öllum starfandi meisturum í löggiltum iðngreinum í byggingariðnaði á félagssvæðinu.
• Að gæta hagsmuna félagsmanna, bæði gagnvart verkkaupum svo og öllum starfsmönnum þeirra, sérstaklega að því varðar launakjör og hvers konar samningsatriði.
• Að vinna að aukinni menntun, verkkunnáttu og vandvirkni í byggingariðnaði.
• Að leiðbeina félögum og vera þeim til aðstoðar í öllu því, sem þeim má að gagni koma og viðkemur iðngreinum að atvinnurekstri þeirra.
• Að vera málsvari félagsmanna gagnvart almenningi og hinu opinbera.

4. gr.

Aðild að félaginu geta átt þeir meistarar á félagssvæðinu sem standa fyrir atvinnurekstri í löggiltri iðngrein í byggingariðnaði. Félagið skal vera aðili að Samtökum iðnaðarins og aðildarreglur SI gilda þar um. MFS gerir jafnframt samning við SI um samstarf og verkaskiptingu.

5. gr.

Meistarar, sem óska eftir inngöngu í félagið, skulu senda stjórn þess skriflega umsókn. Taka ber umsóknina fyrir á næsta fundi stjórnar og afgreiða hana þar. Gera skal grein fyrir nýjum félögum á næsta félagsfundi/aðalfundi.

6. gr.

Félagsmenn skulu greiða árgjald til félagsins, sem aðalfundur, ákveður fyrir eitt ár í senn. Heimilt er að reikna dráttarvexti á félagsgjöld mánuði eftir gjalddaga.

Fullgildir aðildarfélagar sem, náð hafa 70 ára aldri, skulu vera undanþegnir skyldu til greiðslu árgjalds en halda öllum félagsréttindum. Þeir félagar, sem vegna alvarlegara veikinda tapa svo starfsorku sinni að þeir eru frá vinnu í eitt ár eða lengur, geta óskað eftir því við stjórn að árgjald sé fellt niður. Þeir skulu þó halda öllum félagsréttindum.

7. gr.

Úrsagnir úr félaginu skulu vera skriflegar og skal félagi vera skuldlaus við félagið til þess að úrsögn sé gild. Þó getur enginn sagt sig úr félaginu meðan á vinnudeilu eða verkbanni stendur. Enginn getur sagt sig úr félaginu sem hefur verið félagsmaður skemur en sex mánuði.

8. gr.

Félagsmenn skulu beina viðskiptum sínum til aðila innan MFS, svo sem framast er unnt. Þeir skulu helst ekki vinna með öðrum utanfélagsmönnum en iðnnemum, iðnsveinum í starfandi sveinafélögum svo og hjálparmönnum sem samkomulag hefur orðið um milli meistarafélags og sveinafélags. Félagsmenn skulu ekki taka að sér að gera úttekt á verkum annarra félagsmanna nema sem dómkvaddir matsmenn eða ef félagið tilnefnir þá sem slíka.

9. gr.

Félagsmenn mega ekki árita teikningar sem meistarar, nema þeir séu verktakar eða starfsmenn fyrirtækja, enda sjái þeir um daglegt eftirlit meðan á verkinu stendur. Fái stjórnin kæru eða vitneskju um brot á þessu ákvæði, ber henni að rannsaka málið, gera um það skýrslu og gera viðeigandi ráðstafanir til leiðréttingar og leggja fyrir næsta félagsfund, sé um ítrekað brot að ræða.

10. gr.

Félagsmönnum er óheimilt að ganga inn í verk sem annar félagi hefur gert samning um, nema aðilar geri með sér samning þar um. Verði ágreiningur með aðilum skal leita úrskurðar stjórnar.

11. gr.

Telji félagsmaður þörf á aðgerðum vegna ágreinings á vinnustað eða af öðrum ástæðum, skal hann senda stjórn félagsins skrifleg tilmæli þar um ásamt skýrslu um tildrög málsins. Í kjölfar þess ber þá stjórn félagsins að ákveða málsmeðferð.

12. gr.

Verði félagið við kröfu félagsmanns um aðgerð sem leiðir til sérstaks kostnaðar fyrir félagið svo sem vegna málarekstrar eða greiðslu skaðabóta, skal viðkomandi félagi bera kostnað á móti félaginu í hlutfalli 1 á móti 10 ef málið er þannig vaxið að hann einn hefur hag af málarekstrinum. Hins vegar ber félagið allan kostnað ef málið snertir alla í viðkomandi iðngrein.

13. gr.

Stjórn félagsins er skipuð sex mönnum: formanni, ritara, gjaldkera, varaformanni og tveimur meðstjórnendum, kosnum á aðalfundi í skriflegri, bundinni kosningu til þriggja ára í senn. Í fyrsta sinn er formaður kosinn til eins árs, ritari og varaformaður til tveggja ára og gjaldkeri og meðstjórnandi til þriggja ára. Á sama hátt skal kjósa þrjá varamenn til eins árs í senn, einnig tvo endurskoðendur og einn til vara.

14. gr

Stjórnin hefur yfirstjórn allra mála milli funda. Skal hún kalla saman félagsfund, ef 1/5 félagsmanna óskar eftir fundi og getur um ástæðu.

15. gr.

Félagsfundur hefur æðsta vald í öllum félagsmálum. Formaður boðar til allra funda og stjórnar þeim. Þó er formanni heimilt að tilnefna fundarstjóra í sinn stað. Varaformaður gegnir störfum formanns í forföllum hans. Ritari skal bóka, í gjörðabók félagsins í stuttu máli, meðferð mála og afgreiðslu þeirra. Í upphafi næsta fundar skal ritari lesa upp fundargerð síðasta fundar og bera hana upp til samþykktar. Óski tveir stjórnarmenn eða fleiri eftir því að haldinn sé stjórnarfundur skal geta um ástæðu. Þá ber formanni að boða til slíks fundar svo fljótt sem verður við komið. Félagsfundi skal boða þannig að fundarboð hafi borist félagsmanni eigi síðar en þrem dögum fyrir fund og fundarefnis skal getið. Þó má boða áríðandi skyndifund með eins dags fyrirvara. Fundir eru löglegir sé löglega til þeirra boðað. Einfaldur meirihluti atkvæða ræður úrslitum á öllum fundum félagsins nema annað sé tekið fram. Ef um lagabreytingar er að ræða öðlast þær því aðeins gildi að tveir þriðju hlutar atkvæðisbærra fundarmanna greiði þeim atkvæði.

16. gr.

Aðalfund félagsins skal halda fyrir lok aprílmánaðar ár hvert. Skal til hans boðað bréflega með minnst sjö daga fyrirvara. Aðalfundur er löglegur sé löglega til hans boðað

Dagskrá aðalfundar skal vera þannig:

1. Formaður setur fund og skipar fundarstjóra.
2. Formaður flytur skýrslu um störf félagsins á síðasta ári.
3. Gjaldkeri gerir grein fyrir endurskoðuðum reikningum félagsins fyrir síðasta ár og leggur þá fram til afgreiðslu.
4. Lögð fram rekstraráætlun komandi starfsárs
5. Kosning stjórnar, sbr. 13. gr. laga.
6. Kosning varamanna, endurskoðenda og varamanns, sbr. 13. gr. laga.
7. Önnur mál.

17. gr.

Stjórn MFS skal fara með atkvæðisrétt félagsmanna innan Samtaka iðnaðarins.

18. gr.

Reikningsár félagsins er almanaksárið og skal ársreikningum þess lokið eigi síðar en fyrsta mars ár hvert. Þá eru þeir sendir til endurskoðenda sem skulu hafa lokið störfum fyrir fyrsta apríl.

19. gr.

Brot á lögum þessum og löglegum samþykktum stjórnar eða félagsfundar geta varðar sektum frá kr.10.000.00, til kr. 200.000.00. Stjórn MFS ákvarðar sektina. Skjóta má úrskurði stjórnar til félagsfundar til endanlegrar meðferðar. Skal það gert innan eins mánaðar frá úrskurði stjórnar. Heimilt er einnig að víkja viðkomandi úr félaginu um lengri eða skemmri tíma, samkvæmt úrskurði stjórnar eða félagsfundar.

20. gr.

Sé félagið lagt niður skulu eignir þess renna til þeirrar stofnunar, sem að dómi félagsslitafundar er skyldust starfssemi félagsins og líklegust til að koma meisturum á félagssvæðinu að mestum notum. Um félagsslit ber að hafa tvo fundi með mánaðar millibili og þurfa tveir þriðju hlutar atkvæðisbærra fundarmanna að samþykkja á báðum fundum svo löglegt sé.

21. gr.

Lögum þessum má aðeins breyta á aðalfundi. Lagabreytingar skulu lagðar fyrir félagsfund sem haldin er fyrir aðalfund og síðan endanlega afgreiddar á aðalfundi.

22. gr.

Lög þessi öðlast þegar gildi.

Þannig samþykkt á aðalfundi 30. apríl 2003.