Hjartavernd finnur gen sem stjórnar blóðþrýstingi
Vísindamenn frá Hjartavernd hafa fundið gen sem hefur áhrif á nýrnastarfsemi og nýrnabilun auk þess að finna í samvinnu við alþjóðlegt teymi vísindamanna gen sem stjórnar blóðþrýstingi og hefur áhrif á háþrýsting. Frá þessu er greint á mbl.is.
Þetta eru niðurstöður rannsókna sem fjallað er um í vísindatímaritinu Nature Genetics um helgina. Annars vegar byggjast þær á niðurstöðu Öldrunarrannsóknar og hins vegar á langvarandi söfnun upplýsinga í Reykjavíkurrannsókn Hjartaverndar.
Um er að ræða tímamótaniðurstöður í rannsóknum á blóðþrýstingi. Langvarandi háþrýstingur er ein helsta ástæða heilablóðfalla og verulegur áhættuþáttur fyrir þróun kransæðasjúkdóma og hjartaáfalla. Talið er að þriðjungur einstaklinga á miðjum aldri þjáist af háþrýstingi.
Vilmundur Guðnason, forstöðulækni Hjartaverndar, segir í viðtali að niðurstöður nýrnarannsóknarinnar gefi von um að hægt verði að öðlast betri skilning á langvinnri nýrnabilun og finna nýja meðferðarmöguleika eða koma í veg fyrir sjúkdóminn. Með hækkandi aldri þjóða er nýrnabilun vaxandi vandamál. Langvarandi nýrnabilun er einnig verulegur áhættuþáttur í hjarta og æðasjúkdómum.