Samtök Iðnaðarins

Milljarðar gætu sparast á verkum ríkis og sveitarfélaga í mannvirkjagerð yrði gæðastjórnun innleidd meðal verktaka og verkkaupa. Þetta kom fram á morgunverðarfundi Samtaka iðnaðarins, Viðskiptablaðsins, Reykjavíkurborgar og Háskólans á Bifröst um gæðastjórnun í mannvirkjagerð í morgun. Verktakar, verkkaupar og aðrir hagsmunaaðilar fjölmenntu á fundinn.

Hugbúnaðarfyrirtækið TM Software stendur fyrir ráðstefnu á morgun um ýmsar sparnaðarleiðir og hagræðingu í rekstri tölvukerfa. Fundurinn verður í ráðstefnusal fyrirtækisins að Urðarhvarfi 6 í Kópavogi klukkan 13-17.

Helgi Hjörvar þingmaður Samfylkingarinnar og formaður umhverfisnefndar Alþingis leggur til að rekstur virkjana verði seldur einkafyrirtækjum í ákveðinn tíma. Fjármálaráðherra líst vel á hugmyndina.

Hin nýja efnalöggjöf Evrópusambandsins REACH hefur í för með sér tækifæri fyrir fyrirtæki, en aðeins þau sem kynna sér hana í tíma. Þau sem bíða aðgerðarlaus verða of sein. Þetta segir Doris Thiemann hjá Efnastofnun Evrópu sem hélt fyrirlestur á morgunverðarfundi um löggjöfina fyrir helgi.

Samtök iðnaðarins, Viðskiptablaðið, Reykjavíkurborg og Háskólinn á Bifröst standa fyrir morgunverðarfundi um gæðastjórnun í mannvirkjagerð fimmtudaginn 25. september kl. 8.30-10.00.

Í skoðanakönnun sem Capacent Gallup gerði fyrir Samtök iðnaðarins í lok ágúst voru tvær nýjar spurningar lagðar fyrir þátttakendur auk venjubundinna spurninga um Evrópusambandið. Meirihluti aðspurðra, eða 53%, vill að ríkisstjórnin ákveði á kjörtímabilinu hvort sækja eigi um aðild að ESB eða ekki. Og rúmlega 60% segja að afstaða stjórnmálaflokkanna til ESB og upptöku evru muni hafa áhrif á hvernig þeir greiða atkvæði í næstu alþingiskosningum.

Verktakafyrirtækin Íslenskir aðalverktakar og NCC International hafa stefnt íslenska ríkinu og krefjast 520 milljóna króna bóta vegna ólögmætrar frestunar á útboði Héðinsfjarðarganga. Fyrirtækin áttu lægsta tilboð í verkið árið 2003. Í Fréttablaðinu í dag kemur fram að þáverandi samgönguráðherra hafi ákveðið að taka engu tilboðanna sem bárust í verkið.

Samtök iðnaðarins, Umhverfisstofnun, Samtök verslunar og þjónustu og Félag íslenskra stórkaupmanna standa morgunverðarfundi um skráningu, mat, leyfisveitingar og takmarkanir REACH þann 18. september næstkomandi. Dagskráin hefst klukkan 9:00 í Yale salnum á Radisson SAS Hótel Sögu og stendur til klukkan 12.

Mikill samdráttur er fyrirséður í byggingariðnaði þó hann sé ekki enn orðinn eins mikill og reikna má með. Ásgeir Magnússon forstöðumaður skrifstofu atvinnulífsins á Norðurlandi segir í viðtali við Fréttablaðið í dag að draga muni úr vinnu á höfuðborgarsvæðinu þar sem enn eru óseldar um tvö þúsund íbúðir. Sveiflan verður minni á Norðurlandi þar sem byggingarfyrirtæki fóru hægar í sakirnar.

Styttur miðborgarinnar skörtuðu sínu fegursta á menningarnótt þegar þær voru klæddar í sérsaumaða hatta Helgu Rúnar Pálsdóttur búninga- og klæðskerameistara. Hún segir að tíðarandi og persónuleiki þeirra merku manna sem stytturnar eru af hafi haft úrslitaáhrif á útkomuna. Hattarnir hafi vakið athygli og fengið miklar og góðar undirtektir.

Gunnar Guðjónsson tvöfaldur Íslandsmeistari í málaraiðn málaði þrjá veggi á lestarstöð í Finnlandi þegar hann tók þátt í keppni iðnnema í húsamálun á Norðurlandamóti málara. Keppnin fór fram í Helsinki dagana 28-31. ágúst og var hluti af ráðstefnu Norrænna málarameistara sem haldin er annað hvert ár.

Eiður Haraldsson fyrrverandi verktaki spyr í grein í Morgunblaðinu í dag hvort eðlilegt sé að Reykjavíkurborg reyni ekki að halda mannaflsfrekum byggingaframkvæmdum í landi. SI sendu fyrr í þessum mánuði bréf til borgaryfirvalda þar sem lögð er áhersla á mikilvægi þess að við val á tilboði séu gerðar þær kröfur að bjóðendur uppfylli þau skilyrði sem um getur í útboðs- og tilboðsskrá 0.1.3 við opnun tilboða.

PET-Baltija endurvinnsluverksmiðjan var opnuð í Riga í Lettlandi á mánudag. Ingibjörg Sólrún Gísladóttir gangsetti verksmiðjuna sem er að meirihluta í eigu Gámaþjónustunnar. Verksmiðjan mun endurvinna PET flöskur og er stærsta og fullkomnasta verksmiðja sinnar tegundar í Eystrasaltslöndunum.

Frá árinu 2002 hefur álframleiðsla aukist úr 282 þúsund tonnum í 760 þúsund tonn. Á Íslandi starfa tæplega 1500 manns við álver og afleidd störf eru um 3.100. Þetta kemur fram í Fréttablaðinu og er svar iðnaðarráðherra við fyrirspurn varaformanns Framsóknarflokksins.

Miklar vonir eru bundnar við nýja vinnslulínu sem annast hreinsun jarðhitagass með lífrænum hætti við jarðgufuvirkjun Orkuveitu Reykjavíkur á Hellisheiði. Líftæknifyrirtækið Prokatín ehf og Orkuveitan undirrituðu samning þess efnis í gær.

Nýtt verkefni Háskólans í Reykjavík Þegar vel er sáð var formlega hleypt af stokkunum á tíu ára afmæli skólans á dögunum. Þar bjóða nemendur og kennarar endurgjaldslausa vinnu sína til félagasamtaka sem starfa í þágu almannaheilla.

Ekkert kemur fram í úrskurði um heildstætt umhverfismat sem útilokar rannsóknarboranir á Þeistareykjum á meðan matið er í vinnslu. Þetta segir Magnús Jóhannesson ráðuneytisstjóri umhverfisráðuneytisins í Fréttablaðinu í dag. Boranirnar hafa verið í óvissu vegna ólíkrar túlkunar stjórnvalda og framkvæmdaaðila á úrskurðinum.

Stjórn SI fór í heimsókn til þriggja fyrirtækja á Suðurlandi í upphafi septembermánaðar. Litið var inn hjá plaströraverksmiðjunni Set á Selfossi, SS á Hvolsvelli og Límtré á Flúðum. Heimsóknirnar voru hluti af stefnumótunarferð stjórnarinnar dagana 2. – 3. september.