Eigi að koma í veg fyrir algjöra stöðnun í atvinnulífinu verður að grípa til aðgerða án tafar. Ekki dugar að vísa til þess að enn sé verið að leysa brýnni vanda. Stöðvist hjól atvinnulífsins verður þeim ekki svo auðveldlega komið í gang á ný. Þetta segir Jón Steindór Valdimarsson framkvæmdastjóri Samtaka iðnaðarins í grein í Viðskiptablaðinu í dag.

Lesa meira

Jón Steindór Valdimarsson framkvæmdastjóri Samtaka iðnaðarins sagði á Morgunvakt RUV í morgun að afar mikilvægt væri að bankarnir væru djarfir í að hjálpa fyrirtækjum að halda starfsemi sinni áfram. Hlutverk bankanna væri þó ekki auðvelt, þeir væru nýstofnaðir og spurning hversu vel fjárhagslega þeir væru búnir undir þau erfiðu verkefni sem nú blasi við.

Ingibjörg Sólrún Gísladóttir utanríkisráðherra sagði á Alþingi í dag að til greina kæmi að Atvinnuleysistryggingasjóður tæki upp samstarf við Samtök iðnaðarins og Samtök sprotafyrirtækja. Þannig gæti skapast um hundrað ný störf í sprotafyrirtækjum fyrir fólk sem misst hefur vinnuna. Ráðherra vitnaði þannig í ályktun sem rædd var á fjölmennum fundi Samtaka iðnaðar-, ....

Lesa meira

Samdráttur í byggingariðnaði kemur illa við röraverksmiðjuna Set eins og flest önnur fyrirtæki sem tengjast byggingariðnaði. Átta starfsmönnum fyrirtækisins var sagt upp störfum um mánaðarmótin, en fyrirtækið horfir nú til tækifæra sem skapast við breyttar efnahagsaðstæður. „Við ætlum að snúa okkur í auknum mæli að útflutningi, en hann hefur verið illframkvæmanlegur á tímabili hás gengis krónunnar,“ segir Bergsteinn Einarsson framkvæmdastjóri fyrirtækisins sem vinnur nú að endurskipulagningu rekstursins.

Hætta er á að sprotafyrirtæki sem gætu skilað töluverðum tekjum í þjóðarbúið lifi ekki efnahagsþrengingarnar af án stuðnings stjórnvalda. Þorsteinn Ingi Sigfússon, forstjóri Nýsköpunarmiðstöðvar segir í Fréttablaðinu í dag að mörg þeirra geti einungis fjármagnað rekstur sinn til skamms tíma í senn og fyrirgreiðsla í bönkum sé afar erfið.

Lesa meira

„Þessi verðlaun skipta okkur óskaplega miklu máli og styrkja okkur í sölu og markaðsmálum,“ segir Jón Ágúst Þorsteinsson, framkvæmdastjóri Marorku, sem tók við náttúru- og um hverfisverðlaunum Norðurlandaráðs í Helsinki í Finnlandi á þriðjudag. Verðlaunin hlaut Marorka fyrir þróun tölvukerfa sem lágmarka olíunotkun skipa og draga úr mengun og eldsneytiskostnaði.

Lesa meira

Á næstu vikum og mánuðum mun Vegagerðin bjóða út nokkur stór verk sem munu taka um 2-3 ár í framkvæmd. Auk þeirra verða smærri verkefni boðin út sem reiknað er með að fari að mestu fram árið 2009.

Þær breytingar sem eru að verða á íslensku samfélagi verða vaktaðar og áætlanir gerðar um viðbrögð af nýjum samráðshópi um menntun. Aðilar vinnumarkaðarins, menntastofnanir atvinnulífsins og fulltrúar mennta- og félagsmálaráðuneytisins hafa undir forustu Fræðslumiðstöðvar atvinnulífsins (FA) stofnað til samráðsvettvangs á sviði menntunar og þjálfunar.

Fjölmörg orkuverkefni sem Íslendingar koma að eru í gangi erlendis og munu skila gjaldeyristekjum í ríkum mæli í þjóðarbúið. Þetta er haft eftir Guðna Jóhannessyni orkumálastjóra í Viðskiptablaðinu. Hann segir að Íslendingar verði að nýta orkuauðlindir.

Lesa meira

Gervitunglamyndir, loftmyndir og ljósmyndir af Íslandi eru meðal upplýsinga sem nú eru aðgengilegar á nýrri Náttúruvefsjá. Þar má finna fjölbreytt gögn sem tengjast náttúru Íslands, auðlindum og náttúruvernd.

Lesa meira

Jón Steindór Valdimarsson framkvæmdastjóri Samtaka iðnaðarins segir í Viðskiptablaðinu í dag að gjaldeyrisskortir hái flestum iðnfyrirtækjum. Iðnaður hafi skaðast en framleiðslan hafi þó ekki stöðvast. Staðan hafi þó stundum verið tæp. Beðið sé frétta af aðgerðum.

Samkvæmt nýrri könnun Samtaka atvinnulífsins munu stjórnendur 48% fyrirtækja fækka fólki á næstunni, eða hafa þegar gert það, en 14% áforma að fjölga starfsfólki. Tæplega fjögur af hverjum tíu fyrirtækjum halda starfshlutfalli óbreyttu. Þetta þýðir samkvæmt niðurstöðum Morgunblaðsins að í allt munu um sjö þúsund manns missa vinnuna á þessu ári.

„Okkur finnst sérstök ástæða núna til að hvetja fjölskylduna til að elda oftar saman góðan og hollan mat,“ segir Guðrún Adolfsdóttir matvælafræðingur hjá Rannsóknarþjónustunni Sýni. Fyrirtækið býður nú upp á nýtt námskeið sem miðar að því að fjölskyldan eldi oftar saman hollan, ódýran og spennandi mat þar sem íslensk hráefni eru í hávegum höfð.

Jón Steindór Valdimarsson framkvæmdastjóri Samtaka iðnaðarins segir í viðtali við Morgunblaðið í dag að allar líkur séu á að uppsögnum fjölgi á næstunni. Samtökin hvetji til að fyrirtæki bjóði frekar hlutastörf. „Allt er betra en að senda fólk heim,“ segir Jón Steindór. Nú þegar mánaðarmót nálgist geri fyrirtæki hins vegar allt til að láta enda ná saman.

Rúmlega 20 milljón hlutir að nafnvirði seldust í hlutafjárútboði Marel Food Systems í gær. Selt var á genginu 70 og fengust rúmlega 1,4 milljarðar fyrir. Það jafngildir 3,58% af heildarhlutafé félagsins. Stjórn Marel tók öllum tilboðunum sem voru flest frá lífeyrissjóðum. Tilgangur útboðsins var að styrkja fjárhag félagsins og auka viðskipti með hlutabréf þess.

Ávaxtabíllinn hlaut í dag Fjöreggið 2008 við athöfn í Iðnó þar sem Matvæladeginum er fagnað. Verðlaunin eru veitt fyrir lofsvert framtak á matvælasviði og voru afhent við upphaf ráðstefnunnar Íslenskar matarhefðir og héraðskrásir. Ávaxtabíllinn hefur unnið mikið frumkvöðlastarf til að auðvelda aðgang að hollum matvælum og vakið verðskuldaða athygli fyrir.

Það ástand sem fyrirtæki í inn- og útflutningi búa við með að koma peningum á milli landa getur ekki gengið mikið lengur. Á meðan umheimurinn er ekki tilbúinn að eiga viðskipti við þessar aðstæður mun ástandið versna. Þetta sagði Jón Steindór Valdimarsson framkvæmdastjóri Samtaka iðnaðarins í beinni útsendingu á Bloomberg fréttaveitunni í morgun.

Fjármálaráðuneytið hefur sent frá sér tilkynningu um að það hafi óskað eftir að álag vegna skila á staðgreiðslu verði fellt niður tímabundið. Niðurfellingin gildi í eina viku, eða til 22. október.

„Í fyrsta skipi í mjög langan tíma er ég sammála mati Seðlabankans á stöðu mála“, segir Bjarni Már Gylfason hagfræðingur Samtaka iðnaðarins á vef Viðskiptablaðsins í dag. Hann segir öllum ljóst að aðstæður hafi breyst mikið til hins verra á skömmum tíma. Sá eftirspurnarþrýstingur sem kunni að hafa verið til staðar í hagkerfinu sé horfinn og gott betur.

Vladimir Ashkenazy tónlistarmaður, Ólafur Elíasson listamaður, Peer Teglgaard arkitekt og Jasper Parrott ráðgjafi hafa sent frá sér bréf þar sem þeir hvetja til þess að tónlistar- og ráðstefnuhúsið í Reykjavík rísi þrátt fyrir ofviðrið sem nú geisi í kringum Ísland. Í Morgunblaðinu kemur fram að með bréfinu vilji þeir sýna íslensku þjóðinni „skilyrðislausan stuðning“ við að þetta mikilvæga verkefni verði leitt til lykta.

Samtök iðnaðarins skora á þá sem standa fyrir verklegum framkvæmdum að taka ekki skyndiákvarðanir um stöðvun framkvæmda eða frestun þeirra sem nú eru í burðarliðnum. Það geri illt verra við þær aðstæður sem nú ríki.

Gylfi Ingvarsson trúnaðarmaður starfsmanna álversins í Straumsvík hefur sent öllum bæjarfulltrúum í Hafnarfirði bréf þar sem hann skorar á yfirvöld að greiða fyrir stækkun álversins. Í Morgunblaðinu í dag segir að undirbúningur undirskriftalista sé hafinn. Til að knýja á um kosningu þurfa 25% atkvæðisbærra manna í bæjarfélaginu að skrifa undir.

Mikil ásókn er af erlendum fjölmiðlum sem leita viðhorfa Samtaka iðnaðarins við efnahagsástandinu sem nú ríkir hér á landi. Jón Steindór Valdimarsson framkvæmdastjóri Samtakanna segist hafa veitt fjölda erlendra fréttamanna viðtöl, meðal annars BBC í Skotlandi og sænska ríkisútvarpinu.

Hátæknifyrirtækið Marorka hlýtur Náttúru- og umhverfisverðlaun Norðurlandaráðs árið 2008 sem afhent verða 28. október næstkomandi. Fyrirtækið hlýtur verðlaunin fyrir þróun tölvukerfa sem miða að lágmörkun olíunotkunar skipa og draga þannig úr mengun og eldsneytiskostnaði.

Tilnefningar til Fjöreggs Matvæla- og næringarfræðafélag Íslands 2008 hafa verið tilkynntar. Þetta er í 16. sinn sem verðlaunin eru veitt þeim sem þykir hafa sýnt lofsvert framtak á matvæla- og næringarsviði. Samtök iðnaðarins eru bakhjarl Fjöreggsins.

Klæðskera- og kjólameistarafélagið stóð í síðasta mánuði fyrir sýningu á fatnaði sem félagsmenn þess hafa saumað í gegnum tíðina. Sýningin var í tilefni 65 ára afmælis félagsins og var haldin í Ráðhúsi Reykjavíkur. Selma Ragnarsdóttir formaður félagsins segir að sýningin hafi heppnast einkar vel og aðsókn farið fram úr vonum.

Ef orka fæst strax í næsta áfanga Norðuráls í Helguvík er fyrirtækið tilbúið að flýta framkvæmdum þar. Þetta er haft eftir Árna Sigfússyni bæjarstjóra Reykjanesbæjar á vef Víkurfrétta í dag. Tvö önnur verkefni eru ennfremur í góðum undirbúningi.

Össur Skarphéðinsson iðnaðarráðherra sagði í viðtali Í bítinu á Bylgjunni í morgun að áhugi væri fyrir því að reisa erlendar kísilflöguverksmiðjur hér á landi. Eftir þessu hefði verið leitað eftir undirskrift neyðarlaga í gærkvöldi. Tveir staðir hafi verið nefndir í því samhengi, en orku þurfi fyrir starfsemi þeirra. Ráðherrann vill lækka skatta til þess að Ísland sé samkeppnishæft við önnur ríki um slíka starfsemi.

Jón Steindór Valdimarsson framkvæmdastjóri Samtaka iðnaðarins sagði í viðtali í morgunútvarpi RUV að mikilvægt væri fyrir þjóðina að styrkja eigin innviði og efla íslenskan iðnað. Stærsta verkefni yfirvalda væri að tryggja peningaflæði svo hjól atvinnulífsins stöðvist ekki og passa þurfi upp á atvinnustig í landinu. Þjóðin þurfi að halda ró sinni við þessar aðstæður.

Vegna óviðráðanlegra orsaka hefur morgunverðarfundinum „Orkunýting til hagsældar“, sem Samtök iðnaðarins höfðu boðað til í fyrramálið, verið frestað. Nánari tímasetning verður auglýst síðar.

Ef Ísland myndi sækja um aðild að Evrópusambandinu á þessu ári gæti aðild orðið að veruleika í ársbyrjun 2010. Rúmum þremur árum síðar væri möguleiki á að taka upp evru hér á landi. Þetta er mat Aðalsteins Leifssonar, lektors við Háskólann í Reykjavík sem situr í Evrópunefnd forsætisráðuneytisins.

Seðlabankinn verður að gefa skýr skilaboð og upplýsingar um hvað sé verið að gera til að bregðast við falli krónunnar og efnahagsástandinu. Skýra þurfi ummæli talsmanns bankans um að ekki hafi verið áhugi fyrir því að ganga inn í samning milli seðlabanka Bandaríkjanna og þriggja Norðurlanda. Þetta sagði Jón Steindór Valdimarsson framkvæmdastjóri Samtaka iðnaðarins í morgunfréttum Ríkisútvarpsins.

Alþjóðleg ráðstefna í steinsteypufræðum verður helguð Ólafi H. Wallevik forstöðumanni grunnrannsókna Nýsköpunarmiðstöðvar Íslands. Helstu steypuframleiðendur í heimi styrkja rannsóknir steinsteypudeildar rmiðstöðvarinnar sem þykir með fremstu sérfræðinga heims á því sviði. Nýjustu rannsóknir lúta að umhverfisvænni framleiðslu.

Stjórn SI kallar eftir að ríkisstjórn og Seðlabanki marki sér stefnu til langs tíma í efnahagsmálum, tali skýrt og grípi þegar í stað til ráðstafana til þess að greiða úr alvarlegum lausafjárskorti, koma jafnvægi á gengi krónunnar og dragi þannig úr neikvæðum áhrifum niðursveiflu efnahagslífsins.

Lesa meira

Framleiðendur og innflytjendur þurfa að vera búnir að skrá sig í skráningakerfi fyrir 1. október sem tryggir meðhöndlun raf- og rafeindatækjaúrgangs þeirra hér á landi frá áramótum. Séu þeir aðilar að sameiginlegu skilakerfi fleiri framleiðenda og innflytjenda sér það skilakerfi um skráninguna.

Losunarheimildum vegna aukinnar álframleiðslu var í gær úthlutað til álveranna í Straumsvík, Helguvík og á Reyðarfirði. Í Viðskiptablaðinu í dag kemur fram að úthlutunarnefnd losunarheimilda hafi lokið fyrstu árlegu endurskoðun áætlunar um úthlutun heimilda til að losa gróðurhúsalofttegundir.