Íslenskur iðnaður er forsenda lífsgæða í landinu

12. sep. 2017

Íslenskur iðnaður er ein af lykilforsendum velmegunar í landinu. Útflutningsverðmæti iðnaðarins nema á fimmta hundrað milljarða króna og tvær af fjórum meginstoðum íslensks útflutnings eiga rætur að rekja til iðnaðnaðar. Fimmta hvert starf á landinu er tengt iðnaði með beinum hætti í fjölbreyttri starfsemi á sviði framleiðslu-, mannvirkja- og hugverkaiðnaðar. 

Þetta er ágætt að hafa í huga þegar kemur að því að velja vörur og þjónustu, ekki síst þar sem hið innlenda stenst fyllilega samanburð við hið innflutta. Þess vegna er full ástæða til að fagna því að forseti Íslands skyldi taka áskorun okkar um að vinna með okkur að því að sýna íslenska framleiðslu og hönnun á Bessastöðum og á öðrum opinberum stöðum. Innan Samtaka iðnaðarins eru um 1.400 aðildarfyrirtæki sem starfa á ólíkum sviðum en sameinast um einstök málefni sem eru iðnaðinum og þar með landsmönnum öllum til framdráttar. Samtök iðnaðarins eru hreyfiafl í íslensku samfélagi sem eiga að taka frumkvæði í mikilvægum málum sem varða iðnaðinn, leysa verkefni með skapandi hætti og nýjum hugmyndum, koma inní umræðuna á uppbyggilegan hátt og vinna með stjórnvöldum að umbótum í samfélaginu.

Aðaláhersla verður lögð á fjóra meginþætti í starfi samtakanna: menntamál, nýsköpun og tækniþróun, styrkingu innviða og starfsumhverfi íslenskra iðnfyrirtækja í þáttum eins og regluverki, sköttum og hagstjórn. Umbætur á öllum þessum sviðum gera það eftirsóknarverðara að búa á Íslandi og leiða til aukinnar framleiðni og hagsældar fyrir alla landsmenn. Leggja þarf áherslu á að efla iðn-, tækni- og raungreinamenntun þar sem skortur á starfsfólki með slíka menntun er nú þegar staðreynd. 

Forritun er mál 21. aldarinnar og því mikilvægt að hún verði gerð að skyldufagi í grunnskólum. Þar þarf sameiginlegt átak atvinnulífs og stjórnvalda. Menntakerfið okkar verður að aðlaga sig hratt að nýjum veruleika þar sem starfskraftar framtíðarinnar eru að mennta sig núna.Nú þegar fjórða iðnbyltingin er hafin með sínum tækifærum og áskorunum er mikilvægt að stilla saman strengi í þjóðfélaginu.

Samtök iðnaðarins hafa skýr markmið um að Ísland standi jafnfætis þeim löndum sem standa sig hvað best í nýsköpun í heiminum. Á þeim vettvangi eru mörg tækifæri sem hægt er að nýta til að bæta stöðu okkar. Á þessu sviði verðum við að mæta alþjóðlegri samkeppni um umgjörð nýsköpunar. Sterkir innviðir eru forsenda þess að atvinnulífið blómstri um allt land. Það verður að tryggja öryggi og aðgengi hvort sem litið ertil samgangna, fjarskipta, raforku eða gagnatenginga. Á síðustu árum hefur of lítið verið fjárfest í innviðum og því brýnt að bæta þar úr. Til að styðja við hagvöxt næstu ára er nauðsynlegt að ráðast í verulega uppbyggingu innviða landsins með samstarfi hins opinbera og einkaaðila. Stöðugt starfsumhverfi skiptir sköpum fyrir atvinnulífið svo að áætlanir fram í tímann fái staðist. Bæði regluverk og skattkerfi eiga að vera einföld og skilvirk. Ein af helstu áskorunum stjórnvalda er að auka stöðugleika. Mikilvægast er að ráðast að rót vandans sem fólginn er í miklum raunvaxtamun við útlönd og ætti að horfa til þess við endurskoðun peningastefnu sem nú stendur yfir. Eins þurfa stjórnvöld og Seðlabanki Íslands að ganga í takt. Ríkisfjármál eiga að vera í takti við hagsveiflurnar þegar sýna þarf aðhald á hagvaxtarskeiði og bæta í þegar hagkerfið dregst saman.

Það er svo sannarlega gefandi að hitta félagsmenn og heyra af starfsemi ólíkra fyrirtækja. Heyra af því sem vel gengur og eins því sem betur má fara. Sé tekist á við helstu áskoranir með skapandi hætti, nýjum hugmyndum, áræðni og metnaði mun Ísland áfram verða í fremstu röð.

Sigurður Hannesson, framkvæmdastjóri SI

Íslenskur iðnaður, 1. tbl. 23. árg. september 2017