Uppsveifla í iðnaði en hátt gengi krónunnar þungbært
Samtök iðnaðarins gerðu könnun á stöðu og horfum í iðnaði í júní. Könnunin náði til 85 meðalstórra og stórra fyrirtækja í hinum ýmsu greinum iðnaðar með samtals um 6.500 starfsmenn. Sérstaklega var spurt var um áhrif hins háa gengis krónunnar á afkomu iðnfyrirtækja í ár. Helstu niðurstöður eru eftirfarandi:
Áhrifin af háu
gengi krónunnar á afkomu iðnfyrirtækja eru
á heildina litið neikvæð en mismikil eftir greinum
og stærð fyrirtækjanna. Neikvæðust eru áhrifin
í lyfja- og hátækni, plast- og veiðarfæragerð
og málm- og skipasmíðum vegna lakari samkeppnisstöðu
á alþjóðlegum markaði. Mörg fyrirtæki
í jarðvinnu, prenti og pappír og matvælum
og drykkjaframleiðslu njóta hins vegar góðs
af háu gengi sem léttir afborganir á erlendum
lánum og lækkar innkaupaverð á erlendan varning.
Þó skiptast í tvö horn lítil og stór
verktakafyrirtæki, en þau síðarnefndu eru í
alþjóðlegri samkeppni og telja hágengið
til hnjóðs. Ef gengið lækkar á ný
munu áhrifin snúast við.
Velta í iðnaði er áætluð að aukist um fjögur prósent í ár og yfir tíu prósent á næsta ári. Að raunvirði nemur aukningin tveim prósentum í ár og átta prósentum á næsta ári. Fjárfesting er áætluð að aukist yfir tuttugu prósent í ár en sjö prósent á næsta ári. Að raunvirði nemur aukningin tuttugu og einu prósenti í ár og fimm prósentum á næsta ári. Mikil aukning í fjárfestingum í plast og veiðafæragerð og prent og pappír, útskýrir mestan hluta aukningarinnar í ár. Á fyrri hluta ársins hefur starfsmönnum fjölgað um tæp fimm prósent en áætlað er að hluti þeirrar aukningar gangi til baka með haustinu. Tvær greinar, byggingarstarfsemi og jarðvinna, útskýra mestan hluta aukningarinnar, en samdrátturinn framundan tengist fyrirtækjum í lyfjum og hátækni og plast og veiðafæragerð. Ítarlegri upplýsingar er að finna í meðfylgjandi töflu: |