Fréttasafn (Síða 247)

Með ákvörðun sinni í dag komst Neytendastofa að þeirri niðurstöðu að Drífa ehf. , sem selur m.a. lopahúfur og vettlinga í verslunum víða um land undir vörumerkjunum ICEWEAR og NORWEAR, hafi brotið gegn lögum um eftirliti með viðskiptaháttum og markaðssetningu nr. 57/2005.

Húðvörurnar frá Sif Cosmetics eru nú seldar í yfir 400 verslunum í yfir tuttugu löndum víðs vegar um heim undir vörumerkinu BIOEFFECT. Þeirra á meðal eru margar þekktustu snyrtivöru- lífstíls- og stórverslanir heims, á borð við Colette í París, Selfridges í London, Magasin du Nord í Kaupmannahöfn og La Rinascente í Mílanó.

Íslenska rannsóknarfyrirtækið Mentis Cura hefur gert samkomulag við kínverska hátæknisjúkrahúsið WanJia Yuan International Geriatric Hospital um að sjúkrahúsið noti hugbúnað fyrirtækisins við greiningu á Alzheimer og öðrum heilabilunarsjúkdómum.

WorldSkills – heimsmeistaramót iðn- og starfsnámsnemenda 2013 var haldið í Leipzig dagana 3. – 6. júlí. Íslenskir keppendur og dómarar sóttu sér mikla reynslu sem á eftir að skila sér í umræðu um þekkingu iðnnema hér á landi auk þess að lyfta þessum keppnisgreinum á Íslandsmóti iðn- og verkgreina á nýjan stað.

Mennta- og menningamálaráðuneytið auglýsir styrki vegna vinnustaðanáms.
Umsóknartímabilið er 1. júlí 2013 til 31. desember 2013.

Tækni- og hugverkagreinar innan SI sendu í gær ályktun um nýsköpun, nýtingu vaxtartækifæra og eflingu útflutningsgreina framtíðarinnar til allra þingmanna. Samtökin innan þessara greina ásamt Samtökum iðnaðarins óska eftir áframhaldandi samstarfi við stjórnvöld og lýsa sig reiðubúin að að starfa með nýrri ríkisstjórn að vexti og framgangi greinanna.

Umhverfis- og auðlindaráðuneytið auglýsir eftir tilnefningum til tvennra verðlauna sem afhent verða á Degi íslenskrar náttúru, 16. september næstkomandi. Annars vegar er um að ræða Fjölmiðlaverðlaun umhverfis- og auðlindaráðuneytisins og hins vegar Náttúruverndarviðurkenningu Sigríðar í Brattholti.

Pétur Blöndal hefur verið ráðinn framkvæmdastjóri Samáls. Hann mun hefja störf í næsta mánuði. Pétur tekur við af Þorsteini Víglundssyni sem tók nýverið við stöðu framkvæmdastjóra Samtaka atvinnulífsins.

Á dögunum undirrituðu Illugi Gunnarsson mennta- og menningarmálaráðherra og Björn Ágúst Sigurjónsson formaður Verkiðnar samstarfssamning við Verkiðn um Íslandsmót iðn- og verkgreina árið 2014 og þátttöku íslenskra keppenda á World Skills í Brasilíu árið 2015.

Við upphaf vikulegrar göngu styrktarfélagsins Göngum saman í gær afhenti Jóhannes Felixson formaður Landssambands  bakarameistara (LABAK) styrktarfélaginu afrakstur sölu á brjóstabollunni í ár samtals 1.7  milljónir króna.  Allt fé sem Göngum saman safnar fer í styrktarsjóð en félagið veitir árlega styrki til grunnrannsókna á brjóstakrabbameini.

Á ráðstefnunni EdTech Europe 2013, sem fram fór í London sl. föstudag, hlaut Mentor viðurkenningu sem eitt af þremur framsæknustu fyrirtækjum í Evrópu sem samþætta tækni og menntun. Mentor er framsækið og metnaðarfullt fyrirtæki sem hefur jákvæð áhrif á skólastarf auk þess að hafa sýnt mikinn vöxt á síðustu árum.

Jarðhitaskóli Sameinuðu þjóðanna og íslenska fyrirtækið Carbon Recycling International eru meðal þeirra tíu sem tilnefndir eru til Náttúru- og umhverfisverðlauna Norðurlandaráðs í ár. Verðlaunahafinn hlýtur 350.000 danskar krónur í verðlaun auk verðlaunagrips.

Actavis, Íslandsbanki, Nýherji, Síminn, Samtök iðnaðarins, Háskóli Íslands og Háskólinn í Reykjavík tóku á liðnum vetri höndum saman í baráttunni við að auka áhuga ungmenna á verk- og tækninámi og fengu til liðs við sig 20 öfluga nemendur beggja háskóla til að fara í framhaldsskóla landsins með kynningu undir heitinu Tækniáhugi.

Pípulagningaþjónustan Bútur ehf. hefur staðist úttekt á fyrsta þrepi áfangaskiptrar gæðavottunar Samtaka iðnaðarins og hlotið D-vottun.

Rafeyri ehf. hefur hlotið C-vottun SI sem staðfestir að reksturinn er í góðum höndum, studdur með öflugu verkbókhaldi, góðri skipulagningu og með mikla sérstöðu varðandi áherslur í öryggis- og heilbrigðismálum.

Snjallgreiðslur Handpoint veitir einyrkjum og litlum og meðalstórum fyrirtækjum möguleika á að taka á móti kortagreiðslum án þess að greiða mánaðargjöld. Lausnin samanstendur af ókeypis Handpoint appi, snjallsíma eða spjaldtölvu og Handpoint snjallposanum, sem er greiðslukortalesari.

Í haust hefst kennsla á nýrri námsbraut við Borgarholtsskóla sem nefnist Frumkvöðlabraut í verslun og þjónustu. Námið fer að mestu fram í gegnum netið á þeim stað sem nemendum hentar. Það er ætlað þeim sem vilja ná tökum á rekstri lítilla fyrirtækja, stuðla að nýbreytni í rekstri lítilla fyrirtækja, stofna eigið fyrirtæki og á sama tíma safna einingum upp í stúdentspróf.

Í dag voru undirritaðir samningar um aðild Samtaka íslenskra kvikmyndaframleiðenda, SÍK, að Samtökum iðnaðarins og Samtökum atvinnulífsins. Svana Helen Björnsdóttir, formaður SI, Margrét Kristmannsdóttir, varaformaður SA og Hilmar Sigurðsson, formaður SÍK skrifuðu undir samningana.

Héraðsdómur Reykjavíkur komst að þeirri niðurstöðu í dag í máli Flugastraums ehf. gegn Landsbankanum að fjármögnunarleigusamningar Landsbankans (áður SP Fjármögnunar) væru í raun lánasamningar og því væri gengistrygging þeirra ólögleg. Í niðurstöðu dómsins segir m.a. að SP fjármögnun hafi í raun veitt Flugastraumi ehf. lán til kaupa á dráttarvél sem SP fjármögnun kaus að klæða í búning leigusamnings til tryggingar réttindum sínum. Dómsmál þetta er eitt af fjölmörgum málum er Samtök iðnaðarins hafa staðið að með ýmsum fyrirtækjum.

Jón Björnsson hefur verið ráðinn í starf forstjóra ORF Líftækni. Hann tekur við af Dr. Birni L. Örvari sem mun taka við nýrri stöðu framkvæmdastjóra rannsókna- og vöruþróunarsviðs félagsins.