Félagsmenn á Suðurnesjum heimsóttir
Undanfarin ár hefur stjórn Samtaka iðnaðarins lagt land undir fót að hausti eða í vetrarbyrjun og farið í kynnisferð til félagsmanna SI úti á landsbyggðinni. Að þessu sinni lá leiðin suður á Reykjanes en þar voru sótt heim fyrirtækin Kaffitár ehf., Ofnasmiðja Suðurnesja ehf., Hótel Keflavík, Hjalti Guðmundsson ehf. og Bláa lónið heilsuvörur ehf. Síðast en ekki síst fræddi Árni Sigfússon, bæjarstjóri Reykjanesbæjar, ferðalangana um nýtt athafnasvæði við höfnina í Helguvík.
Kaffitár
Fyrsti viðkomustaðurinn var Kaffitár sem hefur aðsetur í Njarðvík. Aðalheiður Héðinsdóttir, framkvæmdastjóri fyrirtækisins og einn eigenda, tók á móti gestum í nýjum, glæsilegum höfuðstöðvum Kaffitárs og kaffiilmurinn, sem lagði að vitum gesta, gaf góð fyrirheit. Fyrirtækið var stofnað fyrir 14 árum og óhætt er að segja að það hafi markað nokkur spor í kaffiframleiðslu hér á landi og haft mikil áhrif á kaffineyslu landsmanna enda er aðall fyrirtækisins nýbrennt og malað kaffi eftir kúnstarinnar reglum. Kaffitár rekur nú kaffihús á þremur stöðum, í Kringlunni, Bankastræti og höfuðstöðvum sínum í Njarðvík. Auk þess rekur fyrirtækið expressóbar sem opnaður var í Leifsstöð í sumar. Starfsmenn Kaffitárs eru 75 talsins.
Ofnasmiðja Suðurnesja og Hótel Keflavík
Frá Kaffitári lá leiðin til Keflavíkur í Ofnasmiðju Suðurnesja sem var stofnuð árið 1972. Steinþór Jónsson, framkvæmdastjóri fyrirtækisins, segir að Ofnasmiðja Suðurnesja sé nú langstærsti framleiðandi ofna á Íslandi með 15 – 20 starfsmenn. Þar eru framleiddir svonefndir Runtyl ofnar en Voryl ofnar eru fluttir inn frá Belgíu. Auk þess framleiðir fyrirtækið ýmsar gerðir handklæðaofna. Steinþór segir að fyrirtækið sé með 89 þúsund ofna á lager og selji ofna fyrir um 200 milljónir króna ár ári.
Steinþór er einnig framkvæmdastjóri Hótels Keflavíkur sem var reist árið 1986 en þá var ekkert hótel í Keflavík enda ekki talinn fræðilegur möguleiki á að reka hótel á Suðurnesjum. Þeir feðgar Jón William Magnússon og Steinþór létu úrtölur þó ekki á sig fá réðust í framkvæmdir og nú eru þar 70 gistiherbergi. „Í þessum bransa voru allir að gera það sama og við urðum að bjóða eitthvað sem ekki var í boði annars staðar svo sem að geyma bíla meðan eigendurnir eru erlendis og aka fólki upp á flugvöll.“ Steinþór segir að hluti hótelsins sé samnýttur með Ofnasmiðjunni og þannig náist niður kostnaður.
Mikið landrými, alþjóðlegur flugvöllur og góð höfn
Undir borðum á Hótel Keflavík fræddi Árni Sigfússon, bæjarstjóri Reykjanesbæjar, hópinn um hið nýja iðnaðarsvæði við Helguvík. Reykjanesbær er nú fimmta stærsta sveitarfélag á landinu og Árni segir að fjárhagsleg staða sveitarfélagsins sé nokkuð góð. Hins vegar standi bærinn höllum fæti hvað varðar útsvars og fasteignagjöld þar sem svæðið sé láglaunasvæði en sveitarfélagið þurfi að veita sambærilega þjónustu og þau sveitarfélög sem fá hærri tekjur. „Við verðum bara að gera hlutina á hagkvæmari hátt ef ekki á illa að fara.”
Árni vekur athygli á því hve stutt sé í raun milli staða á suðvesturhorninu, allt frá Grundartanga til Reykjanesbæjar og tækifærin séu alls staðar á þeim skika. „Eitt af því sem við viljum gera er að skipuleggja Reykjanesið þannig að það sé eitthvert vit í hvar við erum með atvinnustarfsemi, þjónustu og íbúðarhúsnæði svo að eitt rekist ekki á annars horn.“
Helguvík hefur verið skipulögð sem flutningahöfn og þar verður mjög góð aðstaða fyrir stórflutninga að mati Árna. Hann segir stórkostleg tækifæri felast í að vera bæði með skipahöfn og flugvöll og svæðið milli hafnar og vallar hafi verið skipulagt fyrir þjónustu og iðnað en íbúðabyggð muni þróast meðfram ströndinni. „Það hljóta að felast mikil tækifæri í því svæði sem á mikið land, eina bestu höfn til framtíðar sem völ er á, alþjóðlegan flugvöll og sterka tengingu inn á höfuðborgarsvæðið.“
Verktakafyrirtækið Hjalti Guðmundsson ehf.
Andrés Hjaltason, framkvæmdastjóri, tók á móti stjórnarmönnum í Fjölbrautaskóla Suðurnesja í Keflavík og sýndi þeim nýja álmu sem fyrirtækið hafði byggt í kjölfar alútboðs og skilað af sér fyrir skömmu. Þar með eykst húsrými skólans um þrjú þúsund fermetra.
Fyrirtækið Hjalti Guðmundsson ehf. var stofnað árið 1960 og hefur aðallega sinnt útboðsverkum. Núna er fyrirtækið að byggja 3000 fermetra byggingu sem á að hýsa Akurskóla í Innri Njarðvík en því verki á að ljúka í ágúst á næsta ári og uppsteyptu 24 íbúða fjölbýlishúsi við Pósthússtræti á einnig að skila uppsteyptu á næsta ári. Á síðasta ári var lokið smíði 7 hæða 25 íbúða fjölbýlishúss í Keflavík og árið 2002 var lokið við fjögurra hæða fjölbýlishús með 25 leiguíbúðum fyrir aldraða. Sama ár byggði fyrirtækið einnig dælu og hreinsistöð í Ytri Njarðvík en samningsfjárhæðin nam um 105 milljónum króna svo að getið sé nokkurra þeirra verkefna sem Hjalti Guðmundsson ehf. hefur unnið að á undanförnum árum.
Bláa Lónið heilsuvörur ehf.
Að síðustu lá leiðin í Bláa lónið þar sem Anna Sverrisdóttir, aðstoðarframkvæmdastjóri, tók á móti hópnum. Starfsemi Bláa Lónsins er þríþætt, rekstur heilsu lindar, húðlækningastöðvar og þróun og markaðssetning húðverndarvara. Þær eru byggðar á virkum efnum Bláa lónsins og þróaðar í samvinnu við færustu húðlækna, lyfjafræðinga og franska snyrtivörusérfræðinga. Fyrstu vörurnar komu á markað árið 1995 og nú eru framleiddar um 40 tegundir sem skiptast í nokkra vöruflokka. Verið er að hanna nýjar umbúðir fyrir húðvörurnar og þær verða m.a. til sölu í nýrri verslun sem verður opnuð í Leifsstöð innan tíðar.
Bláa Lónið hefur rekið meðferðarstöð fyrir psoriasissjúklinga frá 1993. Sú meðferð hefur hlotið viðurkenningu íslenskra heilbrigðisyfirvalda. Anna segir að orðspor stöðvarinnar hafi borist víða því að fólk úr öllum heimshornum leiti þangað vegna psoriasis og arfgengra húðsjúkdóma. Nú er verið að hefja markaðssetningu nýrrar meðferðarstöðvar sem er í byggingu en stefnt er að því að taka stöðina í notkun í apríl næstkomandi.
Gestir Bláa Lónsins eru um 350 þúsund á ári og fjölgar stöðugt enda koma þangað 7580% allra útlendinga sem sækja landið heim. Bláa Lónið hóf starfsemi sína árið 1992, starfsmenn eru um 90 talsins og veltan nemur tæpum 700 milljónum á ári.