Veik króna styður við endurreisn
„Ég get alveg tekið undir þá skoðun sem talsvert hefur verið til umræðu að veikleiki krónunnar hjálpi til við þær erfiðu aðstæður sem nú eru uppi í efnahagslífinu. Veik króna veldur því að við fáum mun meira fyrir útflutningsvörur okkar og samkeppnisstaða innlendra framleiðenda gagnvart innflutningi er góð“, segir Bjarni Már Gylfason hagfræðingur Samtaka iðnaðarins.
Bjarni segir hins vegar að alls ekki megi túlki þessa takmörkuðu kosti krónunnar sem einhverja stuðningsyfirlýsingu. „Þvert á móti. Krónan og peningastefna síðustu ára á sinn þátt í hruninu sem hér varð. Um langt árabil var gengi krónunnar falsað og því haldið alltof sterku með ógnarháum vöxtum. Það sogaði erlent fjármagn í miklu mæli til landsins, belgdi upp efnahag bankanna, ýtti undir mikinn viðskiptahalla og hvatti fólk og fyrirtæki til skuldsetningar í erlendri mynt. Sú skuldsetning er mikil ógn í dag. Mikið ójafnvægi myndaðist í þjóðarbúskapnum og það gat ekki annað en gengið til baka. Vegna þess hversu hátt boginn var spenntur og hversu lengi spennunni var haldið varð skellurinn þeim mun stærri. Engan óraði þó fyrir því hruni sem varð raunin.“
Þótt veik króna hafi sína kosti við núverandi aðstæður segir Bjarni ljóst að í sögulegu samhengi sé krónan of veik. „Raungengi krónunnar hefur aldrei verið veikara. Í grundvallaratriðum eru forsendur fyrir styrkingu krónunnar en sú staðreynd að útflutningsfyrirtæki séu ekki að skipta erlendum gjaldeyri í krónur segir vel hversu djúpstæð vantrú er á krónunni. Til lengdar verður að stefna inn í annan gjaldmiðil. Saga krónunnar er ein raunasaga frá upphafi sem helgast af stöðugu gengisfalli og óstöðugleika. Ég get ekki með nokkru móti séð að hægt verði að byggja á krónu í framtíðinni.“