Hugverkaiðnaður stærsta útflutningsstoðin í lok áratugar
Útflutningstekjur hugverka- og tækniiðnaðar hafa fjórfaldast frá aldamótum og verður greinin orðin stærsta útflutningsstoðin í íslenska hagkerfinu fyrir lok þessa áratugar ef fer fram sem horfir.
Þetta er meðal þess sem kemur fram í nýrri greiningu á íslenskum iðnaði í alþjóðlegu umhverfi sem Ingólfur Bender, aðalhagfræðingur Samtaka iðnaðarins, hefur gert og kynnt er á Iðnþingi sem fer fram í dag.
Undir hugverkaiðnað falla m.a. fyrirtæki í upplýsingatækni- og fjarskiptaiðnaði, tölvuleikjagerð, kvikmyndagerð, lyfjaframleiðslu, líf- og heilbrigðistækni og ýmsum hátækniiðnaði.
Hlutfall hugverkaiðnaðar af útflutningstekjum var um 4% árið 2000 en er nú 16%. Könnun meðal félagsmanna SI leiðir í ljós að áform um vöxt eru langmest innan hugverka- og tæknitengdra greina. Gera má ráð fyrir að 29% útflutningstekna verði til vegna hugverkatengdrar starfsemi árið 2030 og að greinin verði þá orðin stærst af meginstoðunum fjórum; sjávarútvegi, orkusæknum iðnaði, ferðaþjónustu og hugverkaiðnaði.
Íslenskur iðnaður hefur vaxið verulega undanfarna áratugi og hefur orðið gríðarleg breyting frá árinu 1980 en þá skilaði sjávarútvegur tæplega 60% útflutningstekna landsins. Þrátt fyrir að sjávarútvegur skapi enn mikil verðmæti skýrist lægra hlutfall af vexti hinna stærstu greinanna sem um leið hafa skilað meiri fjölbreytni og viðnámsþrótti í íslensku efnahagslífi. Iðnaður í heild er nú stærsta útflutningsgreinin og skilar um 48% útflutningstekna.
Viðfangsefni Iðnþings í ár er samkeppnishæfni íslensks iðnaðar í alþjóðlegu umhverfi á tímum tæknibyltinga og tollastríða. Viðburðurinn hefst klukkan 14 í Silfurbergi í Hörpu.
Sjávarútvegur var lengi langstærsta útflutningsgreinin. Vöxtur iðngreina hefur aukið fjölbreytni og stuðlað að stöðugleika í efnahagslífi landsins.
Langmestur vöxtur hjá íslenskum fyrirtækjum er í hugverkaiðnaði og er fyrirsjáanlegt að hann verði stærsta útflutningsstoðin í lok þessa áratugar.
mbl.is, 6. mars 2025.
Viðskiptablaðið, 6. mars 2025.