Bakarar vilja sjálfir flytja inn hveiti
Rætt er við Sigurð Má Guðjónsson í Bernhöftsbakaríi, formann Landssambands bakarameistara, LABAK, í Morgunblaðinu þar sem kemur meðal annars fram að bakarar séu nú með í skoðun að hefja eigin innflutning á rekstrarvörum og hráefni, svo sem hveiti, til að bregðast við miklum verðhækkunum að undanförnu. Sigurður Már vinnur að framgangi þess og er í samtali við Bäko, hagsmunafélag þýskra bakara, sem telja má í þúsundum. Í Morgunblaðinu nefnir Sigurður Már sem dæmi um verðhækkanir að 25 kílóa poki af hveiti hafi í byrjun árs kostað bakara á Íslandi 1.600 krónur en sé nú seldur á 3.200 krónur. „Þessar hækkanir koma til vegna stríðsins í Úkraínu og við þeim þarf að bregðast.“
Í umfjöllun Morgunblaðsins kemur fram að í dag séu á Íslandi starfandi alls 46 bakarí en hafi verið fleiri en 100 þegar best hafi látið. Í dag sé þó aðeins um þriðjungur bakaría á Íslandi í samtökunum; 14 bakarí, en 32 utan þeirra. „Við þurfum að fá fleiri til liðs við okkur þannig að efla megi greinina og fagið. Einnig verður að skapa nútímalega ímynd með skírskotun í handverkið og hinn aldagamla bakgrunn greinarinnar,“ segir Sigurður Már sem vill hefja handverksbakstur til vegs og virðingar. Það kemur fram að mest af því brauðmeti sem landinn neytir nú og sé selt í stórmörkuðunum sé verksmiðjuframleitt. Æskilegt sé hins vegar að verslunarkeðjurnar fari í ríkari mæli að taka inn handunnin brauð og kökur, samanber þróun í verslunum til dæmis í Þýskalandi.
Morgunblaðið / mbl.is, 2. júlí 2022.