Meirihluti félagsmanna SI andvígur aðild að ESB
Meirihluti félagsmanna Samtaka iðnaðarins er andvígur aðild Íslands að Evrópusambandinu og hefur andstaðan farið vaxandi. Þegar félagsmenn eru spurðir „hversu hlynnt(ur) eða andvíg(ur) ertu aðild Íslands að Evrópusambandinu?“ svara 43% mjög andvíg(ur) og 14% frekar andvíg(ur). Þannig eru 57% félagsmanna andvígir aðild, eða meirihluti. Hins vegar svara 10% mjög hlynnt(ur) og 16% frekar hlynnt(ur). Þannig eru samanlagt um 26% hlynnt.
Talsverðar breytingar hafa verið í afstöðu félagsmanna til aðildar að Evrópusambandinu á síðustu árum. Veruleg hækkun hefur verið á hlutfalli þeirra sem eru mjög andvígir aðild. Það hlutfall var 22% árið 2024 en mælist nú 43% líkt og áður sagði. Á sama tíma hefur hlutfall þeirra sem eru fylgjandi lækkað. Þannig var hlutfall þeirra sem voru mjög fylgjandi 17% árið 2024 en mælist nú 10%. Einnig hefur hlutfall þeirra sem eru frekar hlynntir farið úr 20% niður í 15% á tímabilinu.
Þetta er meðal þess sem kemur fram í niðurstöðum könnunar sem Outcome framkvæmdi meðal stjórnenda íslenskra iðnfyrirtækja innan Samtaka iðnaðarins í febrúar og mars í ár og síðustu tvö ár. Svarhlutfall er álíka á milli ára.
Samtök iðnaðarins hafa ekki tekið afstöðu til aðildar Íslands að Evrópusambandinu.
