Í fyrsta sinn í sögu Íslensku menntaverðlaunanna sem afhent voru á Bessastöðum í fyrradag var afhent viðurkenning fyrir framúrskarandi framlag til iðn- og verkmenntunar. Átaksverkefnið #kvennastarf hlaut viðurkenninguna en átakinu er ætlað er að stuðla að auknu jafnrétti til náms. Auk þess sem átakið er hvatning til að skoða alla möguleika í vali á námi og framtíðarstarfi og var unnið af Tækniskólanum í samstarfi við iðn- og verkmenntaskóla í landinu.
Sigurður Hannesson, framkvæmdastjóri SI, afhenti viðurkenninguna og sagði meðal annars í ávarpi sínu að brýnt væri að fjölga þeim sem leggja stund á nám í iðn- og verkgreinum til að mæta þörfum framtíðar. Aðsókn í slíkt nám hafi aukist á síðustu árum og sé það vel. En betur megi ef duga skuli þegar við stöndum frammi fyrir því að það vanti enn fleira fagfólk hér á landi. Hann sagði það því mikilvægt að hampa því sem vel sé gert á þessu sviði.
Ólafur Sveinn Jóhannesson, deildarstjóri markaðs- og kynningardeildar Tækniskólans, tók við viðurkenningunni fyrir hönd þeirra sem standa að átakinu.
Aðrar viðurkenningar Íslensku menntaverðlaunanna eru:
Verðlaun fyrir framúrskarandi skólastarf eða menntaumbætur: Leikskólinn Rauðhóll í Reykjavík fyrir fagmennsku og gæði í leikskólastarfi og öflugt þróunarstarf.
Verðlaun sem framúrskarandi kennari: Elísabet Ragnarsdóttir leikskólakennari og aðstoðarleikstjóri við leikskólann Heiðarborg í Reykjavík fyrir einstaka fagmennsku við leikskólakennslu.
Verðlaun fyrir framúrskarandi þróunarverkefni: Þróunarverkefnið átthagafræði í grunnskóla Snæfellsbæjar en það beinist að því að efla jákvæð og virk tengsl skóla og samfélags, þekkingu nemenda á heimabyggð sinni og auka fjölbreytni í námi.
Hvatningarverðlaun Íslensku menntaverðlaunanna: Menntaskóli Borgarfjarðar fyrir framsækna endurskoðun á námskrá með það að leiðarljósi að búa nemendur sem best undir áskoranir í lífi og starfi í nútíð og framtíð.
Afhendingin sem fór fram á Bessastöðum var sýnd á RÚV 3. nóvember. Á vef RÚV er hægt að horfa á afhendinguna.
Á vef Skólaþróunar er hægt að nálgast frekari upplýsingar um Íslensku menntaverðlaunin. Að baki verðlaunanna standa embætti forseta Íslands, mennta- og barnamálaráðuneyti, innviðaráðuneytið, Félag um menntarannsóknir, Grunnur – félag stjórnenda á skrifstofum fræðslumála í sveitarfélögum, Kennaradeild Háskólans á Akureyri, Kennarasamband Íslands, Listaháskóli Íslands (listkennsludeild og tónlistardeild), Menntamálastofnun, Menntavísindasvið Háskóla Íslands, Miðstöð skólaþróunar við Háskólann á Akureyri, Samband íslenskra sveitarfélaga, Samtök áhugafólks um skólaþróun, Samtök iðnaðarins og Skóla- og frístundasvið Reykjavíkurborgar.
Myndir/BIG
