Sigurður Már Guðjónsson, eigandi Bernhöftsbakarís og formaður Landssambands bakarameistara, var um helgina valinn kökugerðarmaður ársins (UIBC World Confectioner of the Year 2022) sem er æðsta viðurkenning sem kökugerðarmönnum getur hlotnast í heiminum. Tilkynnt var um valið á heimsþingi alþjóðasamtak bakara og kökugerðarmanna, UIBC – International Union of Bakers and Confectioners, sem fór fram á Íslandi. Einnig var tilkynnt um val á bakara ársins (UIBC World Baker of the Year 2022) sem er Axel Schmitt frá Þýskalandi.
Innan alþjóðasamtakanna eru 300.000 bakarí og kökugerðir í 5 heimsálfum. Samtökin voru stofnuð 1931 í Búdapest í Ungverjalandi. Samtökin standa að fjölmörgum heimsmeistaramótum líkt og heimsmeistaramóti ungra bakara, heimsmeistaramóti ungra konditora, heimsmeistaramóti bakarameistara og heimsmeistaramóti konditormeistara. Auk þess veita samtökin framúrskarandi fagfólki viðurkenningar.
Myndir/Odd Stefán.
