Iðnaður skapar 29% landsframleiðslunnar
Íslenskur iðnaður er umfangsmikill í íslensku efnahagslífi. Innan iðnaðar er fjölbreytt flóra af fyrirtækjum sem eru samofin öllum sviðum efnahagslífsins. Iðnaðarstarfsemi hér á landi er því afar mikilvægur þáttur í gangverki hagkerfisins sem skapar margvísleg störf. Skapaði greinin ríflega 29% landsframleiðslunnar með beinum hætti á árinu 2016 eða 705 ma.kr. Ef með er tekið óbeint framlag greinarinnar til verðmætasköpunar hagkerfisins er umfang hennar umtalsvert meira.
Af einstökum greinum iðnaðar má nefna að byggingarstarfsemi og mannvirkjagerð vó 6,8% af verðmætasköpun hagkerfisins í fyrra, starfsemi rafmagns-, hita- og vatnsveitu 5,0% og framleiðsluiðnaður án fiskvinnslu 8,4%. Upplýsinga- og fjarskiptaiðnaðurinn skapaði síðan 5,1% landsframleiðslunnar í fyrra og fleiri þættir hugverkaiðnaðarins 3,8%.
Iðnaður að baki a.m.k. þriðjungi hagvaxtarins
Hlutur iðnaðar í hagvaxtarþróun síðustu ára hefur verið umtalsverður. Um þriðjungur hagvaxtarins í núverandi efnahagsuppsveiflu má rekja til iðnaðar með beinum hætti. Óbein áhrif eru síðan umtalsverð þ.e. ef tekið er tillit til allra þeirrar starfsemi sem tengist verðmætasköpun iðnfyrirtækja.
Hefur hlutur iðnaðar í verðmætasköpun hagkerfisins verið að aukast undanfarið sérstaklega vegna mikils vaxtar í þeim greinum iðnaðar sem eru að þjónusta innlenda eftirspurn. Iðnfyrirtæki sem eru í hvað mestri samkeppni við erlend hafa hins vegar liðið fyrir hátt gengi krónunnar. Það hefur þó verið vöxtur.
Sambúð iðnaðar við efnahagssveiflur hér á landi hefur verið erfið. Hefur sveiflunum fylgt miklar breytingar í starfsskilyrðum iðnfyrirtækja. Eftirspurn, framboð framleiðsluþátta og verð þeirra ásamt gengi krónunnar hafa þannig verið á mikilli hreyfingu með efnahagsframvindunni. Hefur þetta staðið í vegi fyrir uppbyggingu iðnaðar hér á landi, fjárfestingu greinarinnar og framleiðniþróun innan hennar. Koma sveiflurnar þannig niður á verðmætasköpun greinarinnar og hagkerfisins alls.