Hvatt til uppbyggingar á hagkvæmu húsnæði
Í frétt mbl.is um nýtt frumvarp félagsmálaráðherra um svokölluð hlutdeildarlán sem ætlað er að auðvelda fólki að kaupa sína fyrstu fasteign kemur fram að Sigurður Hannesson, framkvæmdastjóri Samtaka iðnaðarins, sé jákvæður í garð frumvarpsins. Í fréttinni er vísað í mál Sigurðar á blaðamannafundi ráðherra þar sem kom fram að marksaðsbrestur hafi verið í byggingamarkaði þar sem byggðar séu dýrari íbúðir en kallað sé eftir. Úrræðið sé skilyrt við svokallað hagkvæmt húsnæði, og hámarksverð fyrir tilteknar stærðir íbúða sett í reglugerð, því sé hvatt til uppbyggingar á hagkvæmu húsnæði.
Þá segir jafnframt í fréttinni að ríkið fái öflugt hagstjórnartæki en stefnt sé að því að byggðar verði 400 hagkvæmar íbúðir sem falli undir verkefnið á ári hverju, en mögulegt sé að stýra framboðinu á þann hátt að aukið sé við byggingarmagn þegar kreppir að og dregið úr þegar uppgangur er í efnahagslífinu. „Þannig er dregið úr sveiflum á byggingarmarkaði sem leiðir til hagkvæmari uppbyggingar og meiri skilvirkni,“ segir Sigurður á mbl.is. Byggingarmarkaður hafi lengi verið sveiflukenndari en hagkerfið í heild, sem hafi í för með sér að fyrirtæki þurfi til skiptis að ráða til sín fólk og kaupa tæki þegar vel árar, en segja upp fólki og selja frá sér þegar kreppir að.
mbl.is, 11. júní 2020.
