Kvikmyndaiðnaðurinn skilar háum útflutningstekjum
Útflutningstekjur kvikmynda- og sjónvarpsgeirans á tímabilinu 2014-2018 voru 15,1 milljarður króna. Á sama tíma var framlag ríkisins til Kvikmyndasjóðs og í formi endurgreiðslna vegna kvikmyndagerðar samanlagt um 9,9 milljarðar. Greinin veltir að meðaltali rúmlega 27 milljörðum á ári. Þetta kemur fram í Fréttablaðinu í dag og byggir á tölum Hagstofunnar sem teknar voru út fyrir Samband íslenskra kvikmyndaframleiðenda, SÍK. Í fréttinni er rætt við Hilmar Sigurðsson, framkvæmdastjóra Sagafilm og fyrrverandi formann SÍK, sem segir hluti af þessu hafi verið eitthvað sem vitað var fyrir „en það kom okkur á óvart hversu háar útflutningstekjurnar voru. Greinin er að skila til baka umtalsvert meiru en samanlagt framlag í þessum sjóði, bara í útflutningstekjum.“
Áætlað að kvikmyndaiðnaðurinn skapi rúm 3.400 önnur störf
Þá kemur fram í fréttinni að tölur Hagstofunnar sýni að 1.806 manns hafi að meðaltali verið starfandi við sjónvarps- og kvikmyndaiðnað á tímabilinu, þar af voru 1.189 launþegar og 618 sjálfstætt starfandi. „Þetta er aðeins meira en það sem við höfum venjulega talað um sem er frábært. Hagfræðistofnun HÍ áætlaði árið 2006 að fyrir hvert starf í kvikmyndagerð myndist 1,9 annað starf. Að því gefnu má áætla að iðnaðurinn skapi rúm 3.400 önnur störf sé litið til meðaltals áranna 2014-2019.“
Víðtæk áhrif kvikmyndaiðnaðarins
Hilmar segir í fréttinni að áhrif kvikmyndaiðnaðarins séu víðtækari en margir geri sér grein fyrir. „Könnun Ferðamálaráðs í fyrra sýndi að kvikmyndir, bæði íslenskar og erlendar, lægju að baki 20 prósentum hugmynda að Íslandsferðum hjá erlendum ferðamönnum. Svo eru auðvitað kaup á hótelgistingum, veitingum og bílaleigubílum tengd tökum hérlendis. Þessir hlutir hafa ansi mikil áhrif.“
Stjórnvöld hækki endurgreiðslu tímabundið í 35%
Jafnframt kemur fram í fréttinni að það sé mat Hilmars að næstu skref ríkisins ættu að beinast að núverandi ástandi. „Það er lítið um að vera í kvikmyndageiranum um þessar mundir vegna COVID-19.“ Í fréttinni segir að SÍK hafi stungið upp á að hækka endurgreiðsluna tímabundið, upp í 35% úr 25%, svo hægt sé að koma iðnaðinum fljótt á aftur á fætur þegar faraldrinum lýkur. „Ef engin verkefni skapast verða engin útgjöld en þá verður að sjálfsögðu engin endurgreiðsla heldur. Að því leyti yrði það tiltölulega sársaukalaus aðgerð, en eins og sést á þessum tölum þá greiðir greinin þetta margfalt aftur inn í þjóðfélagið.“
Fréttablaðið / Frettabladid.is, 27. apríl 2020.
Hér er hægt að nálgast hagtölur kvikmyndaiðnaðarins.