Hilmar Veigar Pétursson kjörinn formaður SUT
Hilmar Veigar Pétursson, framkvæmdastjóri CCP, var kjörinn formaður Samtaka upplýsingatæknifyrirtækja - SUT - á aðalfundi í morgun. Hilmar Veigar var sitjandi formaður en hann tók við formennsku í febrúar af þáverandi formanni, Þórólfi Árnasyni.
Nýr stjórnarmaður, Jón Kristjánsson, var kjörinn til tveggja ára og þá voru þau Daði Friðriksson og Sigrún Eva Ármannsdóttir endurkjörin til næstu tveggja ára. Jón Ingi Björnsson var kjörinn til stjórnarsetu til eins árs en hann sat áður í stjórninni. Fyrir sitja í stjórninni þeir Stefán Jóhannesson og Guðmar Guðmundsson en þeir voru kjörnir í fyrra til tveggja ára.
Samtök upplýsingatæknifyrirtækja eru starfrækt undir Samtökum iðnaðarins en innan SUT eru á sjötta tug fyrirtækja í upplýsingatækniiðnaði með á annað þúsund starfsmönnum.