Virðisaukaskattur á bækur og tímarit
FBM og SI styðja málarekstur Prentsmiðjunnar Odda eða móðurfélags þess, Kvos, gegn íslenska ríkinu, þar sem reynt er að fá því hnekkt að lagður sé á 25,5% virðisaukaskattur á bækur sem prentaðar eru hér á landi og ætlaðar eru til endursölu, þá fyrst og fremst fyrir bókaútgefendur.
Ef erlendar prentsmiðjur prenta bækur eða tímarit fyrir íslenskan bókaútgefanda er einungis lagður á 7% virðisaukaskattur við tollafgreiðslu á meðan íslenskum prentsmiðjum er gert að leggja á 25,5% af fullkláruðum bókum eða tímaritum.
Hjá þeim viðskiptavinum íslensku prentsmiðjanna sem eru virðisaukaskattsaðilar og geta fengið virðisaukaskattinn endurgreiddan þýðir þetta meiri fjárbindingu. En fyrir þá viðskiptavini sem eru ekki virðisaukaskattsaðilar, svo sem fjármálastofnanir og ýmis opinber fyrirtæki, þýðir þetta einfaldlega hærra verð sem nemur muninum á virðisaukaskattinum.
Ljóst er að þarna er í raun verið að tollvernda erlenda framleiðslu og þannig stuðla að því að flytja íslenskan iðnað og bókaframleiðslu úr landi.