Kjörís valið fyrirtæki ársins á Suðurlandi
Kjörís hefur verið valið fyrirtæki ársins í árlegri könnun sem Báran, stéttarfélag, og Verslunarmannafélag Suðurlands standa fyrir meðal félagsmanna sinna. Í öðru sæti hafnaði Landsvirkjun og Sláturfélag Suðurlands í því þriðja.
Markmið könnunarinnar er að gera það eftirsóknarvert fyrir fyrirtæki að hljóta nafnbótina og um leið að skapa sér gott orðspor á vinnumarkaði. Fulltrúar starfsmanna og forsvarsmenn Kjöríss tóku á móti formönnum félaganna í dag, sem mættu með veglega blómakörfu og viðurkenningarskjal til staðfestingar á kjörinu.
Könnunin var gerð meðal félagsmanna og spurt út í aðbúnað, stjórnun, líðan og kjarasamningsbundin réttindi.
Á myndinni hér fyrir ofan eru í réttri röð: Anna Kristín Kjartansdóttir, skrifstofustjóri, Valdimar Hafsteinsson, framkvæmdastjóri, Gils Einarsson formaður Verslunarmannafélags Suðurlands, Halldóra S. Sveinsdóttir formaður Bárunnar, stéttarfélag og Guðrún Hafsteinsdóttir, markaðsstjóri.