Nýr formaður og breytingar í stjórn Samtaka sprotafyrirtækja
Aðalfundur Samtaka sprotafyrirtækja 2015 fór fram í desember í húsakynnum Greenqloud, Kringlunni 5. Kosið var milli tveggja hæfra einstaklinga í formannskosningu, þeirra Erlendar Steins Guðnasonar, framkvæmdastjóra Stika ehf. og Gísla Kr. hjá Greenqloud ehf. Félagsmenn kusu Erlend sem formann, en Gísli var kosinn í stjórn í stjórnakjöri sem fór fram að loknu formannskjöri. Aðrir sem kosnir voru til stjórnastarfa voru; Diðrik Steinsson, Mure ehf., Íris Ólafsdóttir, Kúla 3D ehf., Kristján Guðmundsson, Remake Electric ehf. og Margrét Ormslev Ásgeirsdóttir- Carbon Recycling International. Sigrún Jenný Barðadóttir, hjá Eimverk Distillery ehf. var kosin á síðasta aðalfundi til tveggja ára í stjórn SSP og heldur því sjáfkrafa áfram í stjórn.
Fráfarandi formaður Sigmar Guðbjörnsson, hjá Sjörnu-Odda þakkaði meðstjórnmönnum fyrri stjórnar fyrir frábært samstarf og fráfarandi stjórnarmönnum þeim Guðmundi Páli Líndal hjá Brum Invest og Stefáni Þór Helgasyni hjá Klak-Innovit fyrir þeirra framlag til SSP á liðnum árum.
Að loknum reglubundnum aðalfundarstörfum flutti Einar Örn Davíðsson, lögmaður áhugavert erindi um verðmat nýsköpunar- og sprotafyrirtækja sem vakti góða umræðu og áhuga fundarmanna. Þetta verður m.a. eitt af þeim málefnum sem stjórn SSP kemur til með að skoða meira í framhaldinu.