Nýsköpun er drifkraftur verðmætasköpunar
Hugvit er óþrjótandi auðlind og nýsköpun er drifkraftur framþróunar, verðmætasköpunar og gjaldeyrisöflunar fyrir land og þjóð. Mikilvægt er að unnið sé stöðugt að fjölbreyttri nýsköpun í öllum atvinnugreinum. Nýsköpun felst í að hrinda hugmyndum í framkvæmd og skapa nýjar lausnir eða bæta það sem fyrir er. Þetta á við um vöru, þjónustu, tækni, aðferðafræði, stjórnskipulag, verklag, leiðir og markaðsstarf. Árangur mælist í aukinni verðmætasköpun, framleiðni, veltu, betri störfum og auknum gjaldeyristekjum sem aftur eru forsendur fyrir aukinni hagsæld og velferð þjóðar. Um það verður kosið í næstu kosningum.
Við ættum að geta sameinast um þá framtíðarsýn að Ísland sé í fremstu röð sem nýsköpunarland á alþjóðlegum markaði, stórt á sérsviðum, með gæði, framleiðni og farsæld að leiðarljósi. Nýsköpun fer fram innan rótgróinna fyrirtækja jafnt sem sprotafyrirtækja og í samstarfi ólíkra starfsgreina um lausnir sem mæta þörfum viðskiptavina. Þróunarsamstarf atvinnulífs og opinberra aðila til að skapa betri lausnir í heilbrigðis-, mennta-, orku- og umhverfismálum fela í sér mikil tækifæri til nýsköpunar.
Nýsköpunarumhverfið þarf að vera aðlaðandi fyrir fólk og fyrirtæki í ólíkum starfsgreinum. Starfsumhverfið þarf að standast samkeppni við þau lönd sem ganga harðast fram í að laða til sín framsækin fyrirtæki og fólk með rétta þekkingu. Við eigum að setja markið hátt og stefna að því að Ísland sé meðal samkeppnishæfustu landa í heiminum í nýsköpun. Þannig sköpum við hagsæld og fjölgum vel launuðum störfum á Íslandi.
Til að ná árangri í þessum efnum þurfa stjórnvöld, Alþingi og atvinnulíf að vinna saman með markvissum hætti til að hraða þeim umbótum í starfsumhverfinu sem nauðsynlegar eru. Þó margt hafi áunnist á undanförnum árum þurfum við að vinna saman af meiri einurð ef við viljum vera í fremstu röð.
Það eru engar takmarkanir á því að nýta hugvitið til að skapa hagsæld og lífsgæði á Íslandi ef réttir hvatar eru skapaðir. Það er hagur okkar allra að nýsköpun fái veglegan sess í stjórnarsáttmála nýrrar ríkisstjórnar því öflug nýsköpun er lykillinn að aukinni hagsæld.
Davíð Lúðvíksson, forstöðumaður stefnumótunar og nýsköpunar Samtaka iðnaðarins.
Vísir, 22. október 2016.