Vinnustofa um innleiðingu hringrásar í byggingariðnaði
Vinnustofa um innleiðingu hringrásar í byggingariðnaði sem var skipulögð af Miðstöð hönnunar og arkitektúrs, Arkitektafélagi Íslands, Eflu og Grænni byggð, í samstarfi við Samtök iðnaðarins, Reykjavíkurborg og FSRE fór fram í Grósu 19. janúar. Um fjörutíu aðilar úr allri virðiskeðju byggingariðnaðarins, frá fasteignafélögum, verktökum, verkfræðistofum, arkitektastofum, stofnunum og stjórnvöldum tóku þátt í vinnustofunni. Fulltrúar SI í vinnustofunni voru Halldór Eiríksson, formaður Samtaka arkitektastofa, og Bjartmar Steinn Guðjónsson, viðskiptastjóri á mannvirkjasviði SI. Ólafur Ágúst Ingason, sviðsstjóri hjá Eflu, og Sigríður Ósk Bjarnadóttir, framkvæmdastjóri umhverfismála hjá Hornsteini, stýrðu vinnustofunni.
Í tilkynningu segir að niðurstaða vinnustofunnar sé skýr: Ísland stendur nágrannaþjóðum að baki þegar kemur að innleiðingu hringrásar í byggingariðnaði og brýn þörf er fyrir breytingar.
Hvað þarf að gera?
- Nýjar leikreglur
- Markaðstorg fyrir notaðar byggingarvörur
- Öflugt rannsóknasetur byggingariðnaðar
- Hanna nýjar byggingar með áherslu á endurnýtingu og sveigjanleika
- Endurhanna og nýta eldri byggingar
- Grænt hvatakerfi fyrir byggingariðnaðinn
- Sterkt samstarf allra hagaðila
Í tilkynningunni segir jafnframt að það sé ljóst að mikil þörf er á markvissu samtali og samvinnu þvert á alla virðiskeðjuna. Á fundinum var mikill samhljómur þátttakenda um mikilvægi þess að allur geirinn sameinist um að virkja aðferðir hringrásar í byggingariðnaði þvert á hagsmuni. Nú þegar er verið að vinna í þessum málum víða í samfélaginu en öll keðjan verði að taka saman höndum til að tryggja árangur.
Í upphafi fundar fengu þátttakendur innblástur frá erlendum sérfræðingunum, Helle Redder Momsen, skrifstofustjóra Nordic Sustainable Construction frá Danmörku og Alexander van Leersum, forstöðumanni Build to Impact í Rotterdam, Hollandi sem miðluðu af reynslu sinni af innleiðingu hringrásar í byggingar verkefnum. Arnhildur Pálmadóttir arkitekt og Áróra Árnadóttir hjá Grænni byggð fjölluðu um nýleg dæmi um verkefni hér á landi þar og almennt um stöðu mála á Íslandi varðandi innleiðingu hringrásar í byggingariðnaði
Myndir/Víðir Björnsson
Halldór Eiríksson hjá T.ark, formaður Samtaka arkitektastofa.
Ólafur Ágúst Ingason, sviðsstjóri hjá Eflu.
Bjartmar Steinn Guðjósson, viðskiptastjóri á mannvirkjasviði SI.
Halla Helgadóttir, framkvæmdastjóri Miðstöðvar hönnunar og arkitektúrs.