Framlag einstakra greina til hagvaxtarins

Árin 1993 til 2002 jókst landsframleiðslan 41,2% að magni til, sem er gífurlega mikill vöxtur. Það sem er hvað athygliverðast við þennan mikla hagvöxt er að hann átti rætur að rekja í gífurlega umbreytingu á starfsskilyrðum íslenskra fyrirtækja, tengt þátttöku þjóðarinnar í EES samningnum, einkavæðingu ríkisstofnana og breytingar á skattakerfinu. Greinar sem áður höfðu verið leiðandi í verðmætasköpun, eins og fiskveiðar og -vinnsla, juku engu við þann hagvöxt. Aðrar greinar urðu leiðandi. Um 30% af þessum vexti kom úr fjármála- og annarri þjónustu. Það sem er merkilegt er að rúm 23% af hagvextinum kom úr hinum ýmsu greinum iðnaðar. Mannvirkjagerð var þar leiðandi, með um 8%. Þá áttu um 9% af hagvextinum rætur að rekja í starfsemi hátæknifyrirtækja á sviðum UT- og heilsuiðnaðar (framleiðslu og útflutning lyfja og lækningatækja). Þá komu rúm 2% úr stóriðju. Önnur 6% af hagvextinum komu úr margvíslegum öðrum iðnaði.