| Uppruni verðmætasköpunar á Ísland hefur breyst mikið undanfarin ár. Iðnaðurinn hefur sótt á en landbúnaður, fiskveiðar og fiskvinnsla látið undan síga. Árið 2003 skapaði iðnaðurinn tæpan fjórðung af verðmætasköpuninni. Hátæknigreinar eins og upplýsingatækni, framleiðsla lyfja, lækningatækja og sérhæfðs vélbúnaðar skapa nú tæp 4% af landsframleiðslunni. Þessar greinar voru vart merkjanlegar fyrir rúmum áratug. Mannvirkjagerð er að aukast og skapar meir en 10% af verðmætum þjóðarbúsins. Annar iðnaður svo sem matvælaiðnaður (án fiskvinnslu), efnaiðnaður, endurvinnsla, veiðarfæragerð, plast- og gúmmíframleiðsla, pappírs- og prentiðnaður, málm- og skipasmíðaiðnaður og ýmis þjónustuiðnaður skapar tæp 9% af verðmætunum. Í ál- og kísiljárnframleiðslu verður til rúmt 1%. Vegna stóriðjuframkvæmda mun álframleiðslan meira en þrefaldast innan fárra ára. |
