Fréttasafn: 2014 (Síða 2)

Aðalfundur Clean Tech Iceland (Græn tækni) var haldinn í gær í Borgartúni 35. Clean Tech Iceland er starfsgreinahópur innan Samtaka iðnaðarins er starfar að því að bæta framleiðsluferla, framleiðni, nýtni, hráefna- og orkunotkun og að minnka úrgang, mengun og sóun.

Þriðjudaginn 18. nóvember efnir Litla Ísland til hádegisfundar í Húsi atvinnulífsins um starfsmenntun í litlum fyrirtækjum. Leitað verður svara við því hvernig fyrirtækin geti styrkt sig með aukinni menntun starfsfólks. Eigendur lítilla fyrirtækja segja reynslusögur og fulltrúar starfsmenntasjóða veita ráðgjöf um hvernig smærri fyrirtæki geta sótt fjármagn til sjóðanna.

Bandaríska heilbrigðisráðuneytið hefur viðurkennt vöru ísfirska lækningavörufyrirtækisins Kerecis. Þetta kemur fram á fréttavefnum visir.is í dag. Vara Kerecis, sem er úr þorskroði og ætluð til að meðhöndla þrálát sár, er því orðin gjaldgeng hjá félagslega hluta bandaríska heilbrigðiskerfisins, Medicare og Medicaid, sem og öllum þeim þúsundum einkarekinna tryggingafyrirtækja sem þjónusta heilbrigðiskerfið þar í landi.

Rafverktakafyrirtækið Gaflarar ehf hefur staðist úttekt á fyrsta þrepi áfangaskiptrar gæðavottunar Samtaka iðnaðarins og hlotið D-vottun sem er fyrsti hluti gæðavottunarkerfis SI sem tekið er upp í fjórum áföngum.

Menntaskólinn í Reykjavík bar sigur úr býtum í Boxinu - framkvæmdakeppni framhaldsskólanna sem fór fram um helgina. Í öðru sæti var Framhaldsskólinn í Vestmannaeyjum og Menntaskólinn við Sund í því þriðja. Lið frá átta framhaldsskólum leystu þrautir í úrslitakeppninni, sem fór fram í Háskólanum í Reykjavík.

Fjöldi framhaldsskólanema mun leggja leið sína í Háskólann í Reykjavík á morgun, 8. nóvember, til að taka þátt í úrslitum í Boxinu - framkvæmdakeppni framhaldsskólanna. Tuttugu og sex lið tóku þátt í forkeppni og af þeim komust átta í úrslitakeppnina. Í hverju liði eru fimm keppendur. Keppnin er kl. 10-16:30.

Skúlaverðlaunin 2014 hlaut Lára Gunnarsdóttir fyrir handgerða smáfugla úr birki. Verðlaunin eru styrkt af Samtökum iðnaðarins og afhenti Almar Guðmundsson framkvæmdastjóri þau í gærkvöldi.

Hæstiréttur komst að þeirri niðurstöðu í dag að Lýsingu bæri að endurgreiða verktakafyrirtækinu Eykt rúmar 65 milljónir króna ásamt dráttarvöxtum vegna 32 kaupleigusamninga er höfðu að geyma ólöglega gengistryggingu. Samtök iðnaðarins fagna þessari niðurstöðu Hæstaréttar sem varpar skýru ljósi á réttarstöðu þeirra fjölmörgu fyrirtækja sem voru með kaupleigusamninga hjá Lýsingu. 

Viðskiptablaðið fjallaði í dag um þá skoðun Viðskiptaráðs Íslands að leggja eigi niður Fríhöfnina og einkaaðilum verði alfarið eftirlátið að sjá um verslunarþjónustu í Flugstöð Leifs Eiríkssonar. Almar Guðmundsson var í viðtali um málið í Reykjavík síðdegis í dag.

Undirritað hefur verið samkomulag um stofnun Oceana – öndvegisseturs um sjálfbæra nýtingu og vernd hafsins. Samtök iðnaðarins, CleanTech Iceland, umhverfis- og auðlindaráðuneyti, Reykjavíkurborg, háskólar, rannsóknastofnanir og fyrirtæki eru aðilar að samkomulaginu.

Markaðsmál, leyfisveitingar og vöxtur fyrirtækja voru meginþemað á aðalfundi Samtaka íslenskra líftæknifyrirtækja sem haldinn var á dögunum. Undanfarið ár hafa verkefni félagsins tekið mið af nýlegum áherslum SÍL. Leyfisveitingar fyrirtækjanna voru skoðaðar með það í huga að bæta ferlin. Einnig var horft til markaðsmála og tækifæra í líftækni og fjölbreytni greinarinnar.

Á þriðja hundrað manns eru á STEFNUmóti íslensks byggingariðnaðar á Grand Hótel. Fulltrúar atvinnugreina, stofnana og hagsmunaaðila rýna stöðuna og meta mögulegar leiðir í átt að umbótum og framförum. Aldrei áður hefur jafn breiður hópur þátttakenda í byggingariðnaði komið saman til umræðu.

Samkvæmt talningu Samtaka iðnaðarins hefur nýjum íbúðum sem eru í byggingu á höfuðborgarsvæðinu fjölgað um ríflega 400 frá því í mars. Jón Bjarni Gunnarsson, aðstoðarframkvæmdastjóri Samtaka iðnaðarins, segir í viðtali við Morgunblaðið sl. föstudag alla fjölgunina stafi af fjölbýlishúsum. Einbýlishúsum sem eru í byggingu hefur hins vegar fækkað frá síðustu talningu í mars.

Á STEFNUmóti íslensks byggingariðnaðar sem haldið verður þriðjudaginn 4. nóvember á Grand Hótel verður brotið blað í sögu byggingariðnaðar þegar fulltrúar atvinnugreina, stofnana og hagsmunaaðila koma saman til að rýna stöðuna og meta mögulegar leiðir í átt að umbótum og framförum.

Samtök iðnaðarins senda árlega kynningarefni, kort með yfirskriftinni Verk- og tækninám – nema hvað!, til nemenda í 9. eða 10. bekk. Kortið leiðir þau inn á vefsíðuna nemahvad.is þar sem er að finna kynningarmyndbönd þar sem ungt fólk segir frá reynslu sinni af iðnmenntun og störfum innan mismundandi iðngreina.

Í dag verða styrkir úr sjóðnum Forritarar framtíðarinnar afhentir í húsakynnum CCP að Grandagarði 8. Styrkirnir verða afhentir í viðurvist kennara og barna frá þeim skólum sem hlutu styrkina að þessu sinni. Sjóðnum bárust alls 39 umsóknir í þessari úthlutun, flestar frá grunnskólum, eða 67%. Virði styrkjanna er samtals um fjórar milljónir króna.

Samtök atvinnulífsins og Samtök iðnaðarins telja allt of langt gengið í frumvarpi um breytingar á lögum um mat á umhverfisáhrifum – mun lengra en þörf er á samkvæmt tilskipun ESB. Í umsögn samtakanna til Alþingis er bent á að verði frumvarpið samþykkt muni leyfisveitingar flækjast, tími lengjast sem tekur að fá leyfi, kærum fjölga og kostnaður við framkvæmdir aukast.

Fjöregg MNÍ var afhent á Matvæladegi í dag 17. október. Fyrirtækið hlýtur þessa viður kenningu fyrir framleiðslu sína á hágæða laktósafríum mjólkurafurðum. Tilkoma Örnu voru ákveðin tímamót fyrir einstaklinga  með laktósaóþol en vilja geta neytt ferskra mjólkurafurða af því tagi sem hún framleiðir.

"Svört atvinnustarfsemi er ákveðið þjóðarmein sem hefur verið viðloðandi íslenska viðskiptahætti svo lengi sem elstu menn muna. Það er þjóðarmein þegar einhverjir telja sig yfir það hafna að greiða til samfélagsins sanngjarnan hluta af tekjum sínum." Guðrún Hafsteinsdóttir skrifar grein um málið í Fréttablaðinu í dag.

Sveitarfélagið Basel í Sviss bauð nýverið út námskerfi fyrir alla sína grunn- og framhaldsskóla og varð íslenskt hugvit fyrir valinu. Mentor kerfið, sem flestir kennarar, foreldrar og nemendur í grunnskólum á Íslandi þekkja vel, er notað í rúmlega 1000 skólum í sex löndum Evrópu. Við þetta bætast nú 265 skólar í Sviss, nánar tiltekið í sveitarfélaginu Basel.