Sigurður Hannesson, framkvæmdastjóri SI, tók þátt í pallborðsumræðum um fasteignamarkaðinn á Húsnæðisþingi Íbúðalánasjóðs sem fram fer á Hilton Reykjavík Nordica í dag. Þingið hófst í morgun og stendur fram eftir degi. Í máli sínu tók Sigurður undir það að rót vandans á húsnæðismarkaði væri sú að það vantaði fleiri íbúðir. Hann nefndi að íbúðamálin væru munaðarlaus málaflokkur hjá ríkisstjórninni, skipt á milli þriggja ráðuneyta auk þess sem tugir sveitarfélaga komi að málum. Það væri ekki til bóta að færa málefni mannvirkja yfir í félagsmálaráðuneytið eins og rætt hefur verið því mun meira þyrfti til.
Þá sagði hann vanta samhæfingu í málaflokknum og skýra ábyrgð á því að framboð mæti eftirspurn á íbúðamarkaðnum til að koma í veg fyrir ástand líkt og myndast hefur á markaðnum síðustu ár þar sem mikill skortur er á íbúðum með tilheyrandi verðhækkunum. Sigurður sagði jafnframt að ljóst væri að byggja þyrfti meira til að mæta eftirspurn og þeirri uppsöfnuðu þörf sem myndast hefur síðustu ár.
