Stærsti innanhússmarkaður Evrópu kýs íslenskan hugbúnað fyrir starfsemi sína
Stutt er síðan bandaríska fyrirtækið Event Network Inc., sem rekur fjölda verslana í söfnum og görðum í N-Ameríku gerði samning um afgreiðsluhugbúnað frá fyrirtækinu.
„Svarti“ markaðurinn í Beverwijk, Hollandi, var stofnaður 1980 og varð fljótt mjög vinsæll. Þar geta seljendur boðið vöru sína á gólfi, í sölubás eða verslun. Leigutími sölusvæða getur verið mislangur, einn dagur, vika eða lengri tími. De Bazaar býður einnig upp á árskort fyrir seljendur sem vilja tryggja sér sama svæði um hverja helgi.
Hollenska fyrirtækið K3 Business Solutions mun sjá um tæknimálin fyrir De Bazaar vegna uppsetningar LS Retail kerfisins. K3 hefur aðstoðað verslunarfyrirtæki víða um heim við hagræðingu varðandi greiðsluferla og nú er röðin komin að De Bazaar. Verkefnið verður unnið í samstarfi við Qurius Nederland BV.
Richard Hulshof, yfirkerfisstjóri hjá De Bazaar segir að fyrirtækið hafi vandað mjög til valsins og skoðað alla möguleika sem bjóðast á markaði. Íslenski hugbúnaðurinn hafi á endanum verið sá sem hentaði starfseminni best: „LS Retail POS kassalausnin smellpassar við markmið okkar um samræmingu og skilvirkni.”
Um De Bazaar
De Bazaar hefur undanfarin rúm 30 ár verið fjölmenningarlegur vettvangur viðskipta með varning á borð við fornmuni, fatnað, bækur, ávexti og grænmeti. De Bazaar samanstendur í raun af mörgum mörkuðum. Auk hins kunna „Zwarte” Markt, sem áður er getið, er þarna að finna Oosterse Markt, Grand Bazaar, Tölvumarkað, Hal 30 og útimarkaðssvæði með samtals 2.500 bása. Gestir eru að jafnaði rúmlega 50.000 í viku hverri.