Fundur um forvarnir gegn innbrotum á vinnustað
Samtök iðnaðarins héldu vel sóttan rafrænan fræðslufund í morgun fyrir félagsmenn Mannvirkis og Félags vinnuvélaeigenda þar sem fjallað var um forvarnir gegn innbrotum í vinnuvélar og á vinnustaði verktaka og vinnuvélaeigenda. Tilefni fundarins var að töluverð aukning hefur orðið í slíkum afbrotum á síðustu árum hjá félagsmönnum. Markmið fundarins var að veita gagnlegar upplýsingar og koma á framfæri atriðum sem er gott fyrir fyrirtæki að hafa í huga þessu tengt, t.d. þegar kemur að forvörnum, öryggismálum og viðbrögðum þegar innbrot á sér stað.
Á fundinum fjölluðu eftirfaldir sérfræðingar um þessi mál frá ólíkum hliðum og svöruðu spurningum fundargesta:
- Guðmundur Pétur Guðmundsson frá Lögreglunni á höfuðborgarsvæðinu
- Ársæll Ársælsson frá embætti tollstjóra
- Eiríkur Ronald Jósepsson frá Securitas. Hér er hægt að nálgast glærur Eiríks.
Sérfræðingarnir þrír komu á framfæri mörgum mikilvægum og athyglisverðum hugmyndum til að bæta forvarnarvinnu og leiðum til að leysa mál í framtíðinni. Meðal þess voru gæði og staðsetning öryggismyndavéla, lýsing á vinnusvæðum, merkingar og skráning búnaðar og tækja, frágangur búnaðar og tækja og skjót og skýr samskipti við lögreglu þegar innbrot hefur átt sér stað.
Þátttaka á fundinum var mjög góð og myndaðist lífleg umræða meðal fundargesta að erindum loknum.