Raunhæft að fimmfalda kvikmyndaiðnaðinn að stærð
Greininni er í lófa lagið að hefja undirbúning við að laða að enn fleiri erlend verkefni en það vantar litla gulrót til hreyfa málin hratt. Þetta segir Hilmar Sigurðsson, forstjóri Sagafilm og stjórnarmaður í Sambandi íslenskra kvikmyndaframleiðenda, í grein sinni sem birt er í Fréttablaðinu í dag undir yfirskriftinni Skrúfum frá krananum. Hann segir að markmiðum um að skapa fleiri störf, skapa ferðaþjónustunni aukin verkefni og tekjur á nýjan leik, auka tækifæri yngra fólks til spennandi starfa, auka gjaldeyristekjur og ekki síst að skapa grundvöll fyrir auknum tekjum ríkissjóðs til framtíðar megi ná að hluta með tímabundinni hækkun á endurgreiðslu í 35% og með hækkunum á framlögum til kvikmyndasjóðs. Það sé raunhæft markmið að fimmfalda þannig greinina að stærð á næstu þremur árum. Ríkissjóður sitji eftir með meira fjármagn en hann hafi verið með áður. Svo ekki sé talað um landkynninguna og afleiddu jákvæðu áhrifin á ferðaþjónustuna og hagkerfið allt.
Arðbær, umhverfisvænn og hugvitsdrifinn kvikmyndaiðnaður
Hilmar segir í grein sinni að á Íslandi hafi á undanförnum árum byggst upp arðbær, umhverfisvænn og hugvitsdrifinn iðnaður sem uppfyllir öll þau skilyrði sem þarf til að hægt sé að ná framangreindum markmiðum og það sé kvikmyndaiðnaðurinn. Greinin sé vön því að þenjast út og dragast saman hratt og örugglega og geti margfaldað sig í stærð á stuttum tíma. Kvikmyndagreinin starfi í kerfi þar sem allt sé uppi á borðum frá fyrsta til síðasta dags þegar komi að fjárfestingum hins opinbera. Um æðar hagkerfisins hafi runnið margfaldar þær fjárhæðir sem endurgreiðslur vegna kvikmyndagerðar nemi.
27 milljarða velta og veitir 1.800 manns atvinnu á ári
Hilmar segir að árrlega velti framleiðsla kvikmynda- og sjónvarpsefnis 27 milljörðum og veiti að meðaltali um 1.800 manns atvinnu á ári samkvæmt nýlegum tölum Hagstofunnar. Samkvæmt sömu úttekt hefur ríkissjóður fengið fjárfestingu sína í kvikmyndagreininni vel ríflega til baka en hreinar útflutningstekjur greinarinnar nemi 50% meira en heildargreiðslur til hennar. Þar sé um að ræða beinharðan gjaldeyri inn í íslenskt efnahagskerfi. Þá séu ótaldar beinar skatttekjur ríkissjóðs vegna starfseminnar sem séu umtalsvert hærri en fjárfesting hins opinbera. Þá segir Hilmar að um allan heim séu kvikmyndaverkefni í algjöru frosti en hér á Íslandi sjáum við til sólar þar sem þrjár stórar leiknar íslenskar sjónvarpsþáttaraðir verði í tökum í lok mánaðar. Hann segir að þær séu allar fjármagnaðar að mestu með erlendu fjármagni, þó að í þeim öllum sé töluð íslenska.
Fréttablaðið / Frettabladid.is, 14. maí 2020.