Stelpur og tækni verður 3. maí
Verkefnið Stelpur og tækni verður 3. maí næstkomandi þegar um 750 stelpum úr 9. bekkjum grunnskóla er boðið í Háskólann í Reykjavík og fjölmörg tæknifyrirtæki. Að verkefninu standa Háskólinn í Reykjavík, Ský og Samtök iðnaðarins. Það fór upphaflega af stað með styrk úr framkvæmdasjóði jafnréttismála og hefur nú hlotið styrk úr samfélagssjóði Alcoa. Markmiðið er að vekja áhuga stelpna á ýmsum möguleikum í tækninámi og störfum, brjóta niður staðalímyndir og sýna þeim fjölbreytileikann sem einkennir tækniiðnaðinn.
Á deginum eru haldnar vinnusmiðjur í HR í umsjá /sys/tra, félags kvenna í tölvunarfræði við HR, og kennara tölvunarfræðideildar og tækni- og verkfræðideildar. Viðfangsefnin eru af ólíkum toga, til dæmis kynnast þær forritun og gerð vefsíðu með tungumálum vefhönnunar, HTML og CSS. Í ár verður meðal annars líka boðið upp á vinnusmiðju um uppbyggingu tölvuleikja og brotaþol beina. Eftir að vinnustofunum lýkur eru tæknifyrirtæki heimsótt þar sem gefin er innsýn í starfsemina og þau tækifæri sem stelpum bjóðast á vinnumarkaði að loknu tækninámi. Konur sem starfa hjá fyrirtækjunum hafa jafnframt deilt reynslu sinni.
Alþjóðlegt verkefni
Sambærilegur dagur, „Girls in ICT Day“, er haldinn víða um Evrópu á hverju ári og er styrktur af International Telecommunication Union (ITU) og Evrópusambandinu í tengslum við Digital Agenda-áætlunina.