Fréttasafn



7. des. 2018 Almennar fréttir Framleiðsla

80% bókatitla prentaðir erlendis

Heildarfjöldi prentaðra bókatitla sem koma fram í Bókatíðindunum í ár er 614 og þar af eru 490 eða 80% þeirra prentaðir erlendis. Í fyrra voru 402 bókatitlar prentaðir erlendis eða 67%. Það er Bókasamband Íslands sem hefur kannað prentstað íslenskra bóka sem getið er í Bókatíðindum Félags íslenskra bókaútgefenda 2018. Prentuðum bókatitlum fækkar um 10 milli ára en þeir voru 604 á síðasta ári.

Það eru 124 bókatitlar prentaðir innanlands og fækkar þeim um 78 frá fyrra ári og sem hlutfall af heild dregst það saman milli ára um rúmlega 13%. Hlutfallið er 20% í ár en í fyrra var hlutfallið 33%. 

Þegar horft er til einstakra flokka bóka eru barnabækur sá flokkur þar sem hlutfallslega fæstar bækur eru prentaðar á Íslandi en hlutfallslega flestar bækurnar sem eru prentaðar hér á landi eru í flokki fræðibóka, bóka almenns efnis og listabóka. 

Fræðibækur, bækur almenns efnis og listir eru alls 161. 63 (39%) prentuð á Íslandi og 98 (61%) prentuð erlendis.

Skáldverk, íslensk og þýdd, eru 195. 37 (19%) prentuð á Íslandi og 158 (81%) prentuð erlendis.

Saga, ættfræði, ævisögur, handbækur, matur og drykkur eru alls 61. 11 (18%) prentuð á Íslandi og 50 (82%) prentuð erlendis.

Barnabækur, íslenskar og þýddar, eru alls 197. 13 (7%) prentuð á Íslandi og 184 (93%) prentuð erlendis.

Prentun í Evrópu og Asíu

Eftirfarandi sýnir hvar bækurnar eru prentaðar 2017 og 2018: 

Árið 2018        Fjöldi titla          %
Ísland                  124              20,2
Evrópa                 412              67,1
Asía                       78              12,7
Samtals               614             100%


Árið 2017          Fjöldi titla          %
Ísland                   202              33,4
Evrópa                  331              54,8
Asía                        71              11,8
Samtals                604            100%

 

Bokaprentun

Markaðshlutdeild erlendrar bókaprentunar sveiflast með raungengi krónunnar

Markaðshlutdeild erlendrar bókaprentunar hefur sveiflast með raungengi krónunnar undanfarna áratugi líkt og sést á myndinni hér fyrir neðan. Mikil hækkun á raungengi krónunnar sem til er komin vegna mikillar hækkunar innlendra kostnaðarþátta framleiðslunnar, mælt í erlendri mynt, hefur á síðustu tíu árum dregið verulega úr hlutfalli þeirra bóka sem prentaðar eru hér á landi. Endurspeglar það að iðnaðar sem helst keppir við erlendan, líkt og bókprentunin,  hefur versnað umtalsvert í þeirri uppsveiflu sem staðið hefur síðustu ár. Miklar sveiflur í starfsumhverfi fyrirtækja hér á landi draga úr uppbyggingu og verðmætasköpun og kemur niður á lífsgæðum litið til lengri tíma.

 

Prentun-boka-og-gengid