Framtíð Íslands í verðmætasköpun er í hugverkaiðnaði
Bergþóra Halldórsdóttir, Hjörtur Sigurðsson og Guðrún Halla Finnsdóttir sem öll sitja í stjórn Samtaka iðnaðarins skrifa grein á Vísi með yfirskriftinni Hugverkaiðnaður: Framtíð Íslands í verðmætasköpun. Þau segja að hugverkaiðnaður hafi tekið gríðarlegum framförum á undanförnum árum og gegni sífellt stærra hlutverki í íslensku efnahagslífi. Í dag sé greinin ein af fjórum meginstoðum útflutnings á Íslandi, og vöxtur hennar endurspegli hvernig nýsköpun, frumkvöðlastarf og öflug og hvetjandi starfsskilyrði geti knúið fram verðmætasköpun og aukinn efnahagslegan stöðugleika.
Hugverkaiðnaður gæti orðið verðmætasta útflutningsstoðin
Í greininni kemur fram að árið 2023 hafi útflutningstekjur hugverkaiðnaðar numið 264 milljörðum króna, og spáð sé að þær fari yfir 300 milljarða króna á þessu ári. Á síðustu fimm árum hafi útflutningstekjur greinarinnar um það bil tvöfaldast. Þau segja að við lok þessa áratugar gæti hugverkaiðnaður orðið verðmætasta útflutningsstoð Íslands og að hugverkaiðnaður byggirá fjárfestingu í þróun á breiðum grunni sem nái allt frá tölvuleikjagerð og upplýsingatækni til líf- og heilbrigðistækni, lyfjaframleiðslu og hátækni á fjölbreyttum sviðum.
Ánægjulegt að Alþingi festi í sessi áframhaldandi stuðning við hugverkaiðnað
Greinarhöfundar segja að þennan árangur megi þakka elju og framlagi þeirra 18.350 einstaklinga sem starfi í greininni. Starfsfólk fyrirtækja í hugverkaiðnaði búi yfir framúrskarandi hæfni en störf í hugverkaiðnaði séu heilt yfir háframleiðnistörf. Þá hafi áhersla stjórnvalda á stuðning við rannsóknir og þróun verið lykilþáttur í hröðum vexti greinarinnar. Með skattahvötum hafi Ísland byggt upp umhverfi þar sem frumkvöðlar fái ríkt tækifæri til að láta hugmyndir sínar verða að veruleika. Jafnframt segja þau að áframhaldandi vöxtur hugverkaiðnaðar hafi mikil og jákvæð áhrif á hagkerfið. Aukning í útflutningstekjum og fjölgun starfa í greininni dragi úr sveiflum í hagkerfinu og auki stöðugleika. Stefnumörkun stjórnvalda á síðustu árum hafi einnig leitt til þess að Ísland sé nú í fremstu röð þegar kemur að nýsköpun. Það hafi því verið mjög ánægjulegt að Alþingi skyldi festa í sessi áframhaldandi stuðning við hugverkaiðnað. Slíkur stuðningur skapar nauðsynlegan fyrirsjáanleika fyrir fyrirtæki til að fjárfesta og stækka.
Hvetja næstu ríkisstjórn til að vinna markvisst með iðnaðinum að sækja tækifærin
Í greininni segja þau að næsta ríkisstjórn beri ábyrgð á því að viðhalda stöðugri umgjörð og hvötum til nýsköpunar sem styðji við aukna verðmætasköpun á Íslandi. „Við hvetjum sannarlega til þess og að hún vinni markvisst með iðnaðinum að því að sækja tækifærin. Með aukinni alþjóðlegri samkeppni um mannauð og fjárfestingar er nauðsynlegt að Íslendingar haldi áfram að laða til sín hæfileikafólk og fjárfesta í rannsóknum, þróun og mannauði. Samstarf Samtaka iðnaðarins og og stjórnvalda getur tryggt sérstöðu Íslands sem nýsköpunarlands í fremstu röð.“
Samtakamáttur stjórnvalda, atvinnulífs og frumkvöðla er lykillinn
Í niðurlagi greinar höfundanna þriggja segja þau að hugverkaiðnaður sé grein sem byggi á mannauði, fjárfestingu í nýsköpun og drifkrafti frumkvöðla. Með skýrri stefnu næstu ríkisstjórnar um áframhaldandi öfluga umgjörð fyrir nýsköpun geti hugverkaiðnaður orðið burðarás íslensks efnahagslífs. „Samtök iðnaðarins leggja áherslu á að tryggja stöðuga og fyrirsjáanlega umgjörð fyrir nýsköpun og áframhaldandi vöxt hugverkaiðnaðar, sem mun leiða til bættra lífskjara og aukinnar verðmætasköpunar fyrir íslenskt samfélag. Samtakamáttur stjórnvalda, atvinnulífs og frumkvöðla er lykillinn að því að Ísland verði enn frekar þekkt sem hugmyndalandið – land þar sem hugvit og nýsköpun skapa verðmæti og velsæld fyrir alla.“
Vísir, 27. nóvember 2024.