Grænvangur kynnir fyrstu hvítbókina um beina nýtingu jarðhita
Grænvangur hefur kynnt fyrstu hvítbókina um beina nýtingu jarðhita. Útgáfan er afrakstur fjölmargara aðila í baklandi Grænvangs sem hafa sameinast um að varpa ljósi á hvernig jarðhiti getur stutt við orkuskipti, nýsköpun, og sjálfbæra verðmætasköpun, bæði á Íslandi og á alþjóðavettvangi.
Hvítbókin fjallar um hvernig hægt er að umbreyta jarðhita í stefnumarkandi innviði sem stuðla að hagkvæmri húshitun, atvinnuuppbyggingu og sjálfbærum hagvexti. Byggt er á meira en aldarlangri reynslu Íslands og alþjóðlegum dæmum. Þá veitir handbókin hagnýta innsýn í þær stefnur, fjármögnunarleiðir, tæknilausnir og samstarfsform sem gera jarðhitaverkefni farsæl. Allt frá hita- og kælikerfum fyrir byggðarlög til landbúnaðar, fiskeldis, iðnaðar, ferðaþjónustu og innviða í þéttbýli sýnir ritið hvernig nýting jarðvarma getur skapað verðmæti í fjölmörgum atvinnugreinum um leið og stutt er við loftslags- og orkumarkmið.
Meðal þeirra sem unnið hafa að hvítbókinni með því að leggja til efni og taka þátt í vinnuhópi eru Íslandsstofa, COWI, Efla, Jarðboranir, Umhverfis-, orku- og loftslagsráðuneytið, Umhverfis- og orkustofnun, Landsvirkjun, Veitur, Verkís, ON, ORKIS og Isor.
Hér er hægt að nálgast hvítbókina.
