Húsnæðismál eitt mikilvægasta verkefni sveitarfélaganna
Á laugardag verður gengið að kjörborðinu í sveitarfélögum landsins og flokkar keppast nú um athygli fólks í raunheimum jafnt sem á samfélagsmiðlum. Í slíku ati fara málefnin stundum halloka og að þessu sinni fer óþægilega lítið fyrir efnislegri umræðu um eitt mikilvægasta verkefni sveitarfélaganna sem er húsnæðismál. Þetta segja Sigurður Hannesson, framkvæmdastjóri SI, og Halla Gunnarsdóttir, formaður SI, í grein á Vísi með yfirskriftinni Týnda kosningamálið. Þau segja húsnæði hafa grundvallaráhrif á lífsgæði og kjör fólks og hafi verið helsti drifkraftur verðbólgunnar. Þannig snerti húsnæðismál efnahagslífið eins og það leggi sig, ekki aðeins í dag heldur líka til framtíðar. Aðgerðaleysi í dag sé verðbólga framtíðarinnar.
Sveitarstjórnir tryggi lóðir og skipulag sem mæti þörfum samfélagsins
Í greininni segja þau Sigurður og Halla að sveitarfélög haldi á skipulagsvaldinu. Sveitarstjórnir ráði miklu um það hvar sé byggt, hvers konar íbúðir séu byggðar og hvenær. Þannig sé það í þeirra höndum að tryggja nægilegt magn af fjölbreyttum byggingarhæfum lóðum og skipulagi sem mæti þörfum samfélagsins. Þar hafi mikið vantað upp á til að koma á stöðugleika í húsnæðisuppbyggingu. Þau segja að lóðir skili sér seint og illa og hægagangur ásamt síaukinni gjaldtöku sveitarfélaga hafi haft veruleg áhrif á húsnæðisverð til hækkunar.
Skýr krafa um að ríki og sveitarfélög taki höndum saman um lagntímasýn
Þá kemur fram í grein þeirra að á fjölsóttu málþingi VR og SI um húsnæðismál í febrúar sl. hafi komið fram skýr krafa um að ríki og sveitarfélög taki höndum saman um langtímasýn í húsnæðismálum. Skipulagsferli sveitarfélaga hafi sætt talsverði gagnrýni á fundinum og þar séu fjölmörg tækifæri til úrbóta sem geti flýtt fyrir uppbyggingu og átt þátt í að tryggja nægilegt og rétt framboð húsnæðis. Þau segja að á fundinum hafi líka komið fram skilningur á áskorunum sveitarfélaganna við uppbyggingu innviða í nýjum hverfum. En sveitarfélög verði að hafa skýra sýn í málaflokknum. Hvernig ætla þau að hátta uppbyggingu til framtíðar? Verður nægt framboð af lóðum og hvert verður fyrirkomulag gjaldtöku? Mun uppbygging innviða að öllu leyti vera greidd af íbúum nýrra hverfa? Hvernig verður tryggt að skipulag mæti þörfum samfélagsins? Allt séu þetta spurningar sem krefjist vel ígrundaðra svara og geti ráðið miklu um lífsgæði almennings, verðbólguþróun og styrk atvinnulífsins á næstu árum.
Skora á þau sem hljóta kjör til sveitarstjórna að vinna að stöðugleika á húsnæðismarkaði
Í niðurlagi greinar sinnar segja þau Sigurður og Halla að þótt ólíkar skoðanir séu uppi um einstakar aðgerðir til að bregðast við húsnæðisvandanum, þá sé nokkuð ríkur samhljómur um að aðgerðaleysi sé ekki valkostur. „Við köllum eftir því að flokkar í framboði til sveitarstjórna skýri áform sín í húsnæðismálum. Húsnæðismál eru alltof mikilvæg til að þau megi týnast í skrautlegri kosningabaráttu. Það er bæði nauðsynlegt og mögulegt að koma á stöðugleika á húsnæðismarkaði. Við skorum á þau sem hljóta kjör til sveitarstjórna landsins að vinna að því. Nú reynir á, að krefjast raunhæfrar sýnar og ábyrgðar í húsnæðismálum áður en atkvæðin falla. Þegar eitt stærsta hagsmunamál heimilanna er annars vegar eiga kjósendur rétt á skýrum svörum núna, ekki eftir kosningar.“
Vísir, 12. maí 2026.