Íslenskt samfélag þarf þjóðarsátt um bætt lífskjör
„Úttekt AGS á íslensku efnahagslífi er gagnleg og að mörgu leyti í góðu samræmi við áherslur Samtaka iðnaðarins. Meginboðskapurinn er sá að íslenskt samfélag þarf þjóðarsátt um bætt lífskjör, með áherslu á stöðugleika, framleiðni og samkeppnishæfni. Slík sátt snýst um að skapa forsendur fyrir varanlegum lífskjarabata. Einn helsti mælikvarði á lífskjör, landsframleiðsla á mann, hefur staðið í stað í sjö ár, verðbólga hefur verið þrálát, vextir háir og vaxandi áhyggjur eru af samkeppnisstöðu þjóðarbúsins. Ef við náum ekki niður verðbólgu og vöxtum með samhæfðum aðgerðum og aukinni framleiðni, munum við áfram búa við kyrrstöðu í lífskjörum,“ segir Sigurður Hannesson, framkvæmdastjóri SI, í frétt Morgunblaðsins.
Ný þjóðarsátt byggi á ákveðnum grunnstoðum
Í frétt Morgunblaðsins kemur fram að Sigurður telji að ný þjóðarsátt verði að byggjast á ákveðnum grunnstoðum; sú fyrsta að ná bættu jafnvægi á vinnumarkaði, önnur að efla iðn-, tækni- og raungreinamenntun til að koma í veg fyrir skort á sérhæfðu starfsfólki, þriðja að fara í nauðsynlega uppbyggingu orkuinnviða, samgangna og stafrænna innviða og í fjórða lagi þurfi að einfalda regluverk, auka fyrirsjáanleika og skapa betri skilyrði fyrir fjárfestingu, nýsköpun og vöxt fyrirtækja.
Ekki rétti tíminn til að seilast dýpra í vasa heimila og fyrirtækja
Þá kemur fram í frétt Morgunblaðsins að Sigurður telji hugmyndir sendinefndarinnar um mögulega hækkun lægsta virðisaukaskattsþrepsins til að stoppa í halla ríkissjóðs ekki til bóta. „Nú er ekki rétti tíminn til að seilast dýpra í vasa heimila og fyrirtækja. Ísland er nú þegar háskattaríki og auknar álögur á heimili og fyrirtæki myndu veikja samkeppnishæfni og draga úr fjárfestingu. […] Boðuð áform, svo sem niðurfelling eða lækkun á endurgreiðslu virðisaukaskatts vegna vinnu á verkstað og aukin skattlagning fjármálafyrirtækja, vega að fjárfestingargetu og nýsköpun og eru á skjön við þá atvinnustefnu sem stjórnvöld hafa sjálf sett fram. AGS bendir á að hagræðing og endurskoðun útgjalda geti skapað svigrúm í ríkisfjármálum. SI hvetja stjórnvöld til að forgangsraða betur í ríkisrekstri, nýta opinbert fé betur og ráðast samhliða í umbætur á breiðum grunni sem auka framleiðni og hagvöxt.“
Morgunblaðið / mbl.is, 22. júní 2026.
