Hlúum að menntun sem leggur til verðmæti
Löngu er viðurkennt uppbyggilegt samhengi menntunar, framleiðni og velferðar. Góð menntun elur af sér dýrmæt störf sem auka hagsæld einstaklinga og samfélags.
Á umbrotatímum er mikilvægt að forgangsraða málaflokkum; að veita fjármagni til þeirra hluta sem líklegastir eru til að skila því aftur, hratt og vel. Menntun sem atvinnulífið hefur þörf fyrir á því að setja í öndvegi þegar kreppir að.
Undanfarin ár hafa samtök í atvinnulífinu, m.a. Samtök iðnaðarins, beitt sér fyrir því og þráfaldlega bent á að fjölga bæri iðnmenntuðum og tæknimenntuðum. Slíkt nám á að vera sérstakt áhugamál stjórnvaldsins. Af hverju? Vegna þess að fjármagn, sem varið er til slíkrar menntunar, skapar verðmæti hratt og vel. Fólk með iðn- og tæknimenntun er mörgum öðrum líklegra til að leggja mikið til nauðsynlegrar uppbyggingar í atvinnulífinu.
Um þessar mundir birta nokkur öflug fyrirtæki boðskap með fyrirsögninni VIÐ VILJUM VAXA Á ÍSLANDI. Þau vilja gjarnan leggja sitt til svo að endurreisn hér á landi megi takast hratt og vel. Ósk þeirra er m.a. sú að stjórnvöld greiði leið þeirrar menntunar sem sannanlega eykur hagvöxt. Skortur á iðn- og tæknimenntuðu fólki stendur vexti fyrirtækja fyrir þrifum.
Iðnmenntun, tæknifræði, verkfræði, tölvunarfræði og skyldar greinar er góð menntun í öllum skilningi. Nefna má þetta:
-
Fólk með iðn- og tæknimenntun fær tækifæri til skapandi og skemmtilegra starfa.
-
Störfin eru vel launuð.
-
Samneyslan nýtur góðs af sköttum einstaklinga og fyrirtækja.
-
Fyrirtækin ná að vaxa á Íslandi en þurfa ekki að flytja starfsemi að sumu eða öllu leyti til útlanda.
Að undanförnu hafa verið til umræðu dæmi um illskiljanlegan ofvöxt í menntakerfinu. Tímabært er að mynda samstöðu um að auka nýtni í menntakerfinu og byggja það upp með endurreisn fyrirtækjanna í huga. Verðugt og skynsamlegt væri að stjórnvöld og atvinnulíf settu sér markmið um að fjölga iðn- og tæknimenntuðum um 50% á næstu fimm árum.