Fyrsti fundur ráðgjafanefndar Íslands og Evrópusambandsins
Með myndun ráðgjafanefndar Íslands og ESB fá aðilar vinnumarkaðarins og fulltrúar ýmissa félagasamtaka tækifæri til þess að fylgjast með og koma að samningaviðræðunum með skipulögðum hætti og styðja þannig við formlegt hlutverk stofnana ESB og Íslands í samningaviðræðunum. Komið er á formlegu skipulagi sem gerir félagasamtökum kleift að fylgjast með þróuninni í samningaviðræðunum og greiða fyrir samningsmarkmiðum Íslands út frá sjónarmiðum þeirra. Þar að auki skapast grundvöllur til þess að koma á framfæri upplýsingum bæði innan ESB og á Íslandi og eiga skoðanaskipti um hin ýmsu hagsmunamál á sama tíma og uppbyggileg samfélagsumræða er efld.
Stefán Haukur Jóhannesson, sendiherra og aðalsamningamaður Íslands, sat fundinn ásamt Sandy Boyle, formanni alþjóðatengsladeildar EESC, Timo Summa, forstöðumanni sendinefndar ESB á Íslandi og Bryndísi Kjartansdóttur, ráðgjafa ráðherra og formanni samningahóps um EES I.
Fundarmenn ræddu stöðu aðildarviðræðna milli Íslands og ESB og beindu sjónum sérstaklega að nýlega opnuðum kafla 15 um orkumál og veltu því upp hvernig best væri að viðhalda og bæta samkeppni, birgðaöryggi og sjálfbærni.
Ráðgjafanefndin metur mikils viðleitni íslenskra stjórnvalda til að virkja aðila vinnumarkaðarins og fulltrúa ýmissa félagasamtaka í aðildarviðræðuferlinu og hvetur til þess að ferlið verði áfram eins opið og gagnsætt og mögulegt er. Að sama skapi gerir ráðgjafanefndin sér grein fyrir mikilvægi framlags aðila vinnumarkaðarins í aðildarferlinu.
Ráðgjafanefndin samþykkti á fundinum verklagsreglur og verkáætlun næstu tveggja ára.