Lambhagi hlýtur Fjöreggið á Matvæladegi MNÍ 2012
Í upphafi ráðstefnunnar afhenti Orri Hauksson, framkvæmdastjóri SI og formaður dómnefndar, Hafberg Þórissyni, stofnanda og eiganda Lambhaga, Fjöregg MNÍ.
Fjöreggið er verðlaunagripur, hannaður af Gleri í Bergvís og er veittur er á hverjum matvæladegi fyrir lofsvert framtak á sviði matvæla eða næringar. SI hafa gefið gripinn frá upphafi.
Í dómnefndinni sátu, auk Orra, Sigríður Eysteinsdóttir, næringarráðgjafi á Heilbrigðisstofnun Suðurnesja og Fjórðungssjúkrahúsinu á Akureyri, Margrét Dórothea Sigfúsdóttir, skólameistari við Hússtjórnarskóla Reykjavíkur, Gunnar Ingi Sigurðsson, framkvæmdastjóri Hagkaups og Ásmundur Þorkelsson, matvælafræðingur og heilbrigðisfulltrúi.
Fjölmargar ábendingar bárust en fimm tilnefningar fengu sérstaka umfjöllun af því að þær þóttu skara fram úr fjölda ábendinga sem barst til keppninnar.
Gróðrarstöðin Lambhagi var tilnefnd fyrir ræktun á salati og kryddjurtum
Niðurstaða dómnefndar var sú að Lambhagi væri verðugur handhafi Fjöreggsins í ár. Fyrirtækið hefur allt frá stofnun árið 1979 unnið mikla þróunarvinnu við að finna plöntutegundir sem henta við íslenskar aðstæður, en stór hluti framleiðslunnar er ræktaður í gróðurhúsum. Nýverið hafa verið í gangi tilraunir með ræktun á spínati sem lofa góðu og auk þess framleiðir Lambhagi hunang. Lambhagi hefur átt þátt í útvíkkun matarmenningar Íslendinga með breiðu og fersku vöruúrvali allan ársins hring og samtímis dregið úr þörf á dýrum innflutningi.
Samtök iðnaðarins óska Lambhaga hjartanlega til hamingju með viðurkenninguna.
Aðrir tilnefndir:
Matís – fyrir Kjötbókina á rafrænu formi. Íslenska kjötbókin kom fyrst út árið 1994, en í október 2011 var endurútgáfa hennar gefin út í formi vefbókar. Miklar framfarir hafa orðið í kjötiðn og matvælafræðum og því er hér tímabært verkefni á ferðinni, sem höfðar til breiðs hóps. Aðgangur að kjötbókinni er öllum opinn og er hann ókeypis.
Níels Hjaltason deildarstjóri gæðaeftirlits hjá Sláturfélagi Suðurlands – fyrir störf í matvælaiðnaði um árabil. Hann hefur verið frumkvöðull í að bæta meðferð og öryggi matvæla með því að innleiða verklagsferla til að tryggja betri meðferð, kælingu og hreinlæti við matvælavinnslu allt frá slátrun til sölu á kjötvörum. Níels hefur staðið fyrir ýmis konar námskeiðum sem öll snúa að betri meðferð matvæla og auknu öryggi þeirra í gegnum alla matvælakeðjuna.
Skólamatur – fyrir fagleg vinnubrögð við framleiðslu og dreifingu á mat til skólabarna. Markmið fyrirtækisins hefur verið að matreiða heimilislegan mat sem uppfyllir nútíma kröfur um næringargildi. Mikil áhersla er lögð á fræðslu starfsfólks í miðlægu eldhúsi í Reykjanesbæ og í móttökueldhúsum í skólum, góða vinnuaðstöðu, gæði og öryggi í matreiðslu fyrir um 12.000 nemendur í leikskólum, grunnskólum og framhaldskólum.
Vignir G. Jónsson – fyrir vinnu við að tryggja öryggi og gæði framleiðslu sinnar, afurða úr sjávarfangi. Áhersla er lögð á þjálfun og fræðslu starfsfólks, að dreifa ábyrgð og efla vitund starfsmanna, þar sem hver og einn hefur sitt hlutverk og veit nákvæmlega hvert það er. Í fyrirtækinu er rekið virkt gæðakerfi sem hefur fengið IFS (International Food Standard) vottun.