Óvissa um fyrirkomulag endurgreiðslna vegna R&Þ
„Núna er greinin komin fram úr sjávarútvegi í útflutningstekjum, til að setja það í samhengi sem flestir Íslendingar skilja. Það gerðist árið 2025 í fyrsta sinn og greinin er nú í rauninni orðin þriðja stærsta útflutningsgrein Íslands,“ segir Sigríður Mogensen, sviðsstjóri iðnaðar- og hugverkasviðs SI, í frétt Sýnar um umfang tækni- og hugverkaiðnaðar á Íslandi. „Ef rétt verður á málum haldið, það er að segja ef starfsumhverfi þessara fyrirtækja verður áfram hvetjandi og fyrirsjáanlegt, að þá eru allar líkur á því að tækni- og hugverkaiðnaður verði verðmætasta atvinnugrein Íslands bara við loka þessa áratugar.“
Í fréttinni kemur fram að Sigríður segir greinina hins vegar standa frammi fyrir óvissu um fyrirkomulag endurgreiðslna vegna rannsókna og þróunar. „Mörg fyrirtæki sem eru í djúpri nýsköpun og langtíma þróun, til dæmis lyfjaþróun, hátækniþróun og svokallaðri djúptækni, hafa verið að fá synjanir frá Rannís varðandi það að eiga rétt á skattafrádrætti sem fjárfestar, eigendur og aðrir sem koma að þessum fyrirtækjum og fjármögnun þeirra hafa verið að gera ráð fyrir. Ekki vegna þess að það sé sjálfgefið að eiga rétt á því heldur vegna þess að þetta eru einmitt félög sem við viljum styðja við og gæti orðið næstu einhyrningar Íslands.“ Þá kemur fram að nýsköpunarfyrirtæki eigi oft í fjárhagsvanda á fyrstu árum starfseminnar, séu sjaldnast með tekjur og að brýnt sé að fyrirkomulagið verði skýrt og fyrirsjáanlegt. Samtök iðnaðarins hafi komið athugasemdum á framfæri við stjórnvöld í ljósi þess að unnið sé að heildarenduskoðun á lögum um stuðning við nýsköpunarfyrirtæki. „Þetta hefur verið valda ákveðinni óvissu og kurri í greininni en við erum bjartsýn á að það verði hægt að finna lausn á þessu.“
Bylgjan / Vísir, 14. apríl 2026.
Hér er hægt að hlusta á hádegisfréttir Sýnar.