Fréttasafn



17. des. 2014 Framleiðsla

Samtök skipaiðnaðarins - nýr starfsgreinahópur innan SI

Stofnfundur Samtaka skipaiðnaðarins - SSI fór fram 12. desember í Húsi atvinnulífsins. SSI munu starfa sem starfsgreinahópur innan Samtaka iðnaðarins. 

Formaður var kjörinn Þröstur Auðunsson hjá Trefjum og varformaður Sverrir Bergsson í Seiglu. Aðrir í stjórn og varastjórn voru kjörnir Ari Elísson hjá Víkingbátum, Regin Grímsson hjá Mótun og Andri Þór Gunnarsson hjá Infuse ehf.

Á fundinum var farið yfir stefnumótun greinarinnar sem fram fór í nóvember. Stefnumótunin lýsir þeim árangri sem fyrirtæki í greininni vilja ná til ársins 2020 og hvaða forsendur þurfa að vera fyrir hendi til að sá árangur náist.

Árangur til ársins 2020:

  • Íslensk skip í sókn, jafnt á nýjum sem eldri mörkuðum
  • Léttari, sterkari, öruggari og vistvænni lausnir
  • Traustur og öruggur vöxtur íslensks skipaiðnaðar

Forsendur

  • Straumlínulagaðir verkferlar í íslenskum skipaiðnaði
  • Öflug innlend þróun, skilvirkt regluverk og fjármögnun
  • Framleiðsla í sátt og samlyndi við umhverfi og samfélag
  • Fjölbreytt námsframboð með spennandi framtíðarmöguleika
  • Útflutningur og kynning íslenskri þjóð til heilla

Þá voru skilgreind 10 áhersluverkefni eða áherslusvið til að koma framangreindum atriðum í framkvæmd.

  1. Stofnun samtaka greinarinnar - stefna og markmið - fjármögnun - eftirfylgni
  2. Aðgengilegt námsframboð - kynningarefni
  3. Fjármögnun nýsköpunar í greininni - yfirsýn og umbætur
  4. Stefnumörkun í umhverfismálum og vinnuvernd
  5. Búnaður og lausnir uppfylli alþjóðlega staðla
  6. Aukin almenn þekking á trefjaplasti, áfangar í verkmenntaskólum, örnámskeið og  endurmenntun í greininni
  7. Útflutningur og kynningarmál, hugarfarsbreyting gagnvart efnisvali og bætt ímynd
  8. Bætt samstarf við Samgöngustofu, tillögur um breytingar, skrá um reglur og einfaldara eftirlit
  9. Dropinn holar steininn - skipshlutar úr trefjaplasti á stálskipum
  10. Hvatar til að kaupa innlenda framleiðslu - Endurgreiðsla aðflutningsgjalda

Með stofnun samtakanna er fyrsta verkefnið í höfn og nýrrar stjórnar bíður að skipuleggja framhaldið með starfsmönnum Samtaka iðnaðarins. SI óska fyrirtækjum í greininni til hamingju með þennan nýja vettvang.