Stjórnendur finnskra byggingarfyrirtækja heimsækja SI
Samtök iðnaðarins fengu nýverið góða gesti þegar hópur stjórnenda finnskra byggingarfyrirtækja kom til landsins. Byggingarfyrirtækin eru einkarekin, frumkvöðlastýrð fyrirtæki sem starfa aðallega á sviði íbúðauppbygginga, atvinnuhúsnæðis og endurbóta. Um er að ræða lítil og meðalstór svæðisbundin verktakafyrirtæki með sterkar staðbundnar rætur.
Í heimsókninni fjallaði Ingólfur Bender, aðalhagfræðingur SI, meðal annars ítarlega um efnahagsstöðuna í byggingariðnaðinum á Íslandi og þær áskoranir sem uppi eru um þessar mundir. Þar var meðal annars rætt um þróun húsnæðismarkaðarins, stöðu framkvæmda og horfur í greininni. Aðrir fulltrúar SI sem tóku á móti hópnum voru Jóhanna Klara Stefánsdóttir, sviðsstjóri mannvirkjasviðs SI, og Íris Gunnarsdóttir, viðskiptastjóri á mannvirkjasviði SI.
Heimsóknin var góður vettvangur til að efla tengsl, miðla þekkingu og ræða sameiginlegar áskoranir og tækifæri í byggingariðnaði á Norðurlöndum.
Jóhanna Klara Stefánsdóttir, sviðsstjóri mannvirkjasviðs SI.
Ingólfur Bender, aðalhagfræðingur SI.