Stjórnendur móti uppbyggilega vinnustaðamenningu
Á rafrænum fræðslufundi Málms sem fór fram í vikunni var fjallað um öryggi og menningu á vinnustað. Hildur Ólafsdóttir, mannauðsstjóri Marels á Íslandi, og Þorgeir Óðinsson, formaður Samtaka leikjaframleiðenda og framkvæmdastjóri Directive Games, héldu erindi.
Hildur fjallaði um mannauðsstefnu Marels og hvaða aðferðir fyrirtækið hefur stuðst við undanfarið til þess að auka og viðhalda þekkingu stjórnenda og starfsfólks á öruggu vinnuumhverfi og stuðla að jákvæðum samskiptum á vinnustað. Hildur sagði meðal annars að Marel hafi innleitt EKKO (einelti, kynferðisleg áreitni, kynbundin áreitni og ofbeldi) verkferla sem tryggja rétt viðbrögð komi upp atvik á vinnustað. Hún sagði ábyrgðina liggja hjá stjórnendum fyrirtækja að móta uppbyggilega vinnustaðamenningu, öruggt starfsumhverfi og vera fyrirmynd þegar kemur að samskiptum.
Erindi Þorgeirs fjallaði um ávinning góðrar vinnustaðamenningar. Hann fór yfir sáttmála um örugga vinnustaði sem Samtök leikaframleiðenda, Rafíþróttasamtaka Íslands og Game Makers Iceland undirrituðu á þessu ári. Hann sagði sáttmálann vera tækifæri fyrir fyrirtæki að gera betur í því að skapa öruggt vinnuumhverfi fyrir alla óháð kyni, uppruna, trúarbrögðum og þjóðerni.
Lilja Björk Guðmundsdóttir, viðskiptastjóri Málms á iðnaðar- og hugverkasviði SI, greindi frá því að slíkur sáttmáli væri innblástur og tækifæri fyrir aðila Málms. Mörg fyrirtækjanna væru þegar komin með verkferla um samskipti á vinnustöðum en sambærilegur sáttmáli gæti auðveldað þeim sem ekki hafa hafið þá vegferð. Hún sagði markmið Málms vera að fjölga starfsfólki í málmgreinum og með því að setja sér stefnu um öryggi á vinnustað stuðli fyrirtækin að jákvæðri vinnustaðamenningu og bættum samskiptum allra aðila. Þetta skili sér í aukinni ásýnd trausts og trúverðugleika, ánægðara starfsfólki og aukinni samkeppnishæfni.