Stjórnvöld beiti skattahvötum til að örva nýsköpun
Nýsköpun er ein meginforsenda framleiðniaukningar, verðmætasköpunar, samkeppnishæfni og gjaldeyrisöflunar fyrirtækja og þjóða. Markmiðið með nýsköpunarstefnu og aðgerðum í málaflokknum er að efla þjóðarbúið í harðri alþjóðlegri samkeppni um störf og verðmætasköpun. Sýn og stefna í nýsköpun er þannig ein af meginstoðum öflugrar atvinnustefnu. Þetta segir Sigríður Mogensen, sviðsstjóri hugverkasviðs SI, í grein sem ber yfirskriftina Hlutverk hins opinbera við eflingu nýsköpunar sem birt er í vorhefti Þjóðmála.
Í greininni segir Sigríður það vera fagnaðarefni að fram sé komin nýsköpunarstefna fyrir Ísland. Titill stefnunnar sé „Nýsköpunarlandið Ísland“, en stefnunni sé ætlað að gera Ísland betur í stakk búið til að mæta áskorunum framtíðarinnar með því að byggja upp traustan grundvöll fyrir hugvitsdrifna nýsköpun á öllum sviðum. Hún segir stjórnvöld búa yfir ýmsum tækjum og tólum til að hafa áhrif á ákvarðanatöku í atvinnulífinu. Fjárfesting í nýsköpun sé ekki undanskilin. Aðgerðir stjórnvalda til að hvetja til nýsköpunar þurfi að vera markvissar og færa megi rök fyrir því að áhrifaríkast sé að hafa áhrif á hegðun og ákvarðanatöku fyrirtækja en að stjórnvöld eigi síður að reka stórar stofnanir tileinkaðar ákveðnum markmiðum.
Sigríður segir nýsköpun verða í atvinnulífi. Stjórnvöld geti stutt við nýsköpun með því að beita útfærslum í skattkerfinu, með því að hafa áhrif á hugarfar og orðræðu, með því að stíga inn þar sem markaðsbrestur er til staðar, svo sem skortur á fjármagni, og með því að tryggja að stefnur gangi í takti. Dæmi um þetta sé innkaupastefna hins opinbera en hún ætti að vera mun sveigjanlegri og samræmast markmiðum um að efla nýsköpun. Í greininni fjallar Sigríður sérstaklega um eitt þessara hlutverka, beitingu skattahvata til að örva nýsköpun. Hún fer yfir skattafrádrátt rannsókna- og þróunarverkefna, hvata til fjárfestinga í sprotafyrirtækjum, skattaívilnanir fyrir erlenda sérfræðinga og verndun og skráningu hugverka.
Á vef Þjóðmála er hægt að lesa greinina í heild sinni.