Tímabært að framlög til byggingarannsókna verði aukin
Það er löngu tímabært að framlög til byggingarannsókna verði aukin og fagna samtökin því að komið verði á fót rannsóknarsjóði byggingarannsókna. Þetta kemur fram í umsögn Samtaka iðnaðarins og Samtaka atvinnulífsins um drög að frumvörpum um opinberan stuðning við nýsköpun og Tækniþróunarsjóð sem send hefur verið í Samráðsgátt. Í umsögninni segir að samtökin styðji við breytingar sem gerðar verði á nýsköpunarumhverfi byggingariðnaðarins í þeim tilgangi að efla það og styrkja. Taka samtökin einnig heilshugar undir mikilvægi þess að koma á og halda uppi öflugum rannsóknum á sviði bygginga- og mannvirkjagerðar en allt of lítið fjármagn hafi runnið til slíkra verkefna á undanförnum árum.
Samtökin segja einnig í umsögninni að brýnt sé að móta langtímaáætlun um rannsóknir og þróun í byggingariðnaði og fagna því að til standi að Byggingavettvanginum, samráðsvettvangi hagaðila í bygginga- og mannvirkjagerð, verði falið að móta slíka áætlun.
Þá árétta samtökin mikilvægi þess að útgáfa svokallaðra Rb-blaða verði efld og þau gerð aðgengilegri. Blöðin séu í raun kennsluefni um rétta aðferðarfræði og séu því til þess fallin að auka gæði, draga úr tjóni og efla þekkingu í greininni. Samtökin fagna því áformum um að halda starfseminni áfram innan Húsnæðis- og mannvirkjastofnunar en að tryggja þurfi nægilegt fjármagn til verkefnisins og vinna að forgangsröðun verkefna í samráði við atvinnulífið og menntastofnanir.
Hér er hægt að nálgast umsögn SI og SA.